தமிழக சட்ட சபை தேர்தலில் பா.ஜ.க வேட்பாளர்களை ஆதரித்து பிரதமர் செல்போன், தொலைபேசி மூலம் பிரசாரம் செய்ய இருக்கிறார்.

தமிழகத்தில் தேர்தல்களம் சூடுபிடிக்க ஆரம்பித்துள்ளது. பல்வேறு அரசியல் கட்சிகளின் தலைவர்களும் தேர்தல் களத்தில் தங்களை முழு வீச்சில் ஈடுபடுத்தி பிரசாரம் மேற்கொண்டு வருகின்றனர். அதன் படி, தமிழக பாஜக. சார்பிலும் தேர்தல்பிரசாரம் தீவிரமாக மேற்கொள்ளப்பட்டு வருகிறது. எனினும், தங்கள் பிரசாரத்திற்கு மேலும் வலுசேர்க்கும் வகையில், பிரதமர் நரேந்திர மோடி, கட்சியின் தேசிய தலைவர் அமித் ஷா உள்ளிட்ட அரசியல் தலைவர்களும் தேர்தல்பிரசாரம் மேற்கொள்ள தமிழகம் வர இருக்கின்றனர்.

பாஜக. பிரசாரத்தை மேலும் மெரு கூட்டும் வகையில் பிரதமர் நரேந்திர மோடியின் ‘வாய்ஸ் மெசேஜ்’ என்ற மென்பொருள் தயார் செய்யப்பட்டு, வாக்காளர்களின் செல்போன் மற்றும் தொலைபேசி எண்கள் மூலம் பிரதமர் நரேந்திர மோடியே நேரடியாக பேசும் வகையில் ஏற்பாடு செய்யப்பட்டுள்ளது.

இந்ததிட்டம் ஏற்கனவே பீகார் தேர்தலில் சோதனை அடிப்படையில் மேற்கொள்ளப் பட்டது. தற்போது அசாம் மற்றும் மேற்கு வங்காள வாக்காளர்களிடம் இந்ததிட்டம் செயல்படுத்தப்பட்ட பிறகு, தமிழ்நாடு, கேரளா மற்றும் புதுச்சேரி மாநிலங்களிலும் செயல்படுத்தப்பட உள்ளது.

அதன்படி, தமிழகத்தில் இந்ததிட்டம் பிரதமர் நரேந்திர மோடியின் நேரடி பிரசாரத்திற்கு சில தினங்களுக்கு முன் ஆரம்பித்து அவரது பிரசாரத்திற்கு பின்னும் நடைமுறைப் படுத்தப்பட உள்ளது.