370வது சட்டப் பிரிவை ரத்து செய்தது தொடர்பான உச்சநீதிமன்ற தீர்ப்பு வரலாற்று சிறப்புமிக்கது என பிரதமர் மோடி திங்கள்கிழமை தெரிவித்துள்ளார். இந்ததீர்ப்பு “ஜம்மு & காஷ்மீர், லடாக்கில் உள்ள நமது சகோதரிகள் மற்றும் சகோதரர் களுக்கு நம்பிக்கை, முன்னேற்றம், ஒற்றுமை ஆகியவற்றின் மகத்தான அறிவிப்பு” என்று அவர் பெருமையுடன் கூறினார்.

சட்டப்பிரிவு 370 ஐ ரத்துசெய்வது தொடர்பான இன்றைய உச்ச நீதிமன்றத் தீர்ப்பு வரலாற்றுச் சிறப்பு மிக்கது மற்றும் 5 ஆகஸ்ட் 2019 அன்று இந்திய நாடாளுமன்றம் எடுத்த முடிவை அரசியலமைப்பு ரீதியாக உறுதிப்படுத்துகிறது; இது ஜம்மு, காஷ்மீர் மற்றும் லடாக்கில் உள்ள நமது சகோதரிகள் மற்றும் சகோதரர்களுக்கு நம்பிக்கை, முன்னேற்றம் மற்றும் ஒற்றுமையின் ஒருஉறுதியான அறிவிப்பு. நீதிமன்றத்தின் தீர்ப்பு இந்தியர்களாகிய நாம், எல்லாவற்றிற்கும் மேலாக அன்பாகவும், போற்றவும் வைத்திருக்கும் ஒற்றுமையின் சாரத்தை வலுப்படுத்தியுள்ளது” என்று சமூக ஊடகமான X இல் பதிவிட்டுள்ளார் மோடி.

ஜம்மு காஷ்மீர் மாநிலத்துக்கு சிறப்பு அந்தஸ்து வழங்கும் 370வது சட்டப்பிரிவின் விதிகளை ரத்து செய்யும் மத்திய அரசின் முடிவை ஒருமனதாக உறுதிசெய்த உச்ச நீதிமன்றத் தீர்ப்பு, 2024 மக்களவைத் தேர்தலுக்கு முன்னதாக மோடிக்கும் பாரதிய ஜனதாவுக்கும் பெரும் ஊக்கமாகப் பார்க்கப்படுகிறது.

“ஜம்மு, காஷ்மீர் மற்றும் லடாக் பகுதிகளைச்சேர்ந்த மக்களுக்கு உங்கள் கனவுகளை நிறைவேற்றுவதற்கான எங்கள் அர்ப்பணிப்பு அசைக்க முடியாததாக இருக்கும் என்பதை நான் உறுதியளிக்க விரும்புகிறேன். முன்னேற்றத்தின் பலன்கள் உங்களை சென்றடைவது மட்டுமல்லாமல், 370வது பிரிவின் காரணமாக பாதிக்கப்பட்ட நமதுசமூகத்தின் மிகவும் பாதிக்கப்படக்கூடிய மற்றும் ஒதுக்கப்பட்ட பிரிவினருக்கும் அதன் பலன்களை வழங்குவதை உறுதி செய்வதில் நாங்கள் உறுதியாக இருக்கிறோம்” என்று மோடி பதிவில் கூறினார்.

“இன்றைய தீர்ப்பு வெறும் சட்டத் தீர்ப்பு மட்டுமல்ல; இது நம்பிக்கையின் கலங்கரை விளக்கமாகவும், ஒளிமயமான எதிர் காலத்திற்கான உறுதிமொழியாகவும், வலிமையான, ஒன்று பட்ட இந்தியாவைக் கட்டியெழுப்புவதற்கான நமது கூட்டு உறுதிப்பாட்டின் சான்றாகவும் உள்ளது” என்று பிரதமர் மேலும் கூறினார்.