நாடாளுமன்ற பட்ஜெட் கூட்ட தொடரின் 2வது பகுதி இன்று தொடங்க உள்ள நிலையில், 2ஜி அலைக்கற்றை தொடர்பான ஜே.பி.சி வரைவுஅறிக்கை, நிலக்கரி ஊழல் , தில்லியில் அதிகரித்து வரும் பாலியல் குற்றங்கள் போன்றவை குறித்து நாடாளுமன்றத்தில் பா.ஜ.க பிரச்னை எழுப்பும்” என பா.ஜ.க தேசிய தலைவர் ராஜ்நாத்சிங் கருத்து தெரிவித்துள்ளார் .

தில்லி துவாரகாவில் நடந்த பொதுக்கூட்டத்தில் அவர் பேசியதாவது

2ஜி அலைக்கற்றை ஒதுக்கீடுவிவகாரத்தை விசாரித்து வரும் நாடாளுமன்ற கூட்டுக்குழுவின் (ஜேபிசி) இறுதிவரைவு அறிக்கையை அதன் தலைவர் பிசி. சாக்கோ தயாரித்துள்ளார்.

அந்த அறிக்கையில் அலைக் கற்றை விவகாரத்தில் முன்னாள் பிரதமர் வாஜ்பாய் உள்ளிட்டோரின் நற்பெயருக்கு களங்கம்ஏற்படுத்தும் வகையில் சிலகருத்துகளை அவர் பதிவுசெய்துள்ளார்.

வாஜ்பாய் தலைமையில் மத்தியில் ஆட்சி நடைபெற்ற போது அலைக்கற்றை ஒதுக்கீட்டில் அரசுக்கு ரூ. 48,000கோடி நஷ்டம் ஏற்பட்டுள்ளதாக வரைவுஅறிக்கையில் கூறப்பட்டுள்ளது. ஜஸ்வந்த்சிங், அருண்ஷோரி ஆகியோரின் பெயரையும் இந்த விவகாரத்தில் சேர்த்துள்ளார்.

அரசியல்வாழ்வில் அப்பழுக்கற்ற நற்பெயரைபெற்றுள்ள வாஜ்பாய் மீது களங்கம்கற்பிக்க நினைத்தால் பா.ஜ.க சும்மாயிருக்காது. மத்தியில் ஆட்சியை தக்கவைத்து கொள்ளவும், மக்களை தவறாக வழிநடத்தும்நோக்கிலும் வரைவு அறிக்கையை சாக்கோ தயாரித்துள்ளார். இந்தஅறிக்கை குறித்து கூட்டுக் குழுவில் இடம்பெற்றுள்ள உறுப்பினர்களுடன் அவர் ஆலோசிக்கவில்லை. இந்த அறிக்கையை நிராகரிக்கவேண்டும் என்று மற்ற ஜே.பி.சி உறுப்பினர்களை தேசியஜனநாயக கூட்டணியும் கேட்டுக்கொண்டுள்ளது.

இது குறித்து 25-ம்தேதி நடைபெறும் ஜே.பி.சி கூட்டத்தில் கேள்வி எழுப்புவோம் .அலைக்கற்றை வழக்கில் முக்கியகுற்றவாளியாக சேர்க்கப்பட்டுள்ள முன்னாள் மத்தியஅமைச்சர் ஆ. ராசா, தன்னை ஜேபிசி முன்பு ஆஜராக அனுமதிக்கவேண்டும் என பல முறை கோரிக்கை விடுத்தும் நிராகரித்துள்ளனர் .

அலைக்கற்றை விவகாரத்தில் பிரதமர் , மத்திய நிதியமைச்சர் ப. சிதம்பரம் ஆகியோரை விசாரிக்கவேண்டும் என்று ஜேபிசி உறுப்பினர்கள் வலியுறுத்தினர். அதையும் கண்டு கொள்ளாமல் இருவருக்கும் வரைவு அறிக்கையில் நற்சான்று வழங்கியுள்ளார் சாக்கோ என்றார் .