பா.ஜ.க மாநிலப் பொதுச்செயலாளர் ஆடிட்டர் ரமேஷ் கொலைவிவகாரத்தை நாடாளுமன்றத்தில் எழுப்புவோம் என்று பாஜக தெரிவித்துள்ளது.

சேலத்தில் கடந்த 19ஆம்தேதி ஆடிட்டர் வி.ரமேஷ் கொலைசெய்யப்பட்டார். இந்நிலையில், தமிழகத்தில் அண்மையில் நடைபெற்றுள்ள பா.ஜ.க, இந்து அமைப்பினரின் கொலைகள்குறித்து விசாரிப்பதற்காக பா.ஜ.க சார்பில் குழு அமைக்கப்பட்டது.

பாஜக.,வின் செய்தித் தொடர்பாளர் பிரகாஷ் ஜவடேகர் , நிர்மலா சீதாராமன், மக்களவை உறுப்பினர் ஆனந்த்ஹெக்டே ஆகியோர் இந்த குழுவில் இடம்பெற்றுள்ளனர்.

இந்த குழுவினர் சேலம் மரவனேரியில் உள்ள ஆடிட்டர் ரமேஷின் வீட்டுக்கு வியாழக் கிழமை வந்தனர். ரமேஷின் உருவப்படத்துக்கு அஞ்சலிசெலுத்திய மூவரும், அவரது குடும்பத்தினரைச் சந்தித்து ஆறுதல் கூறினர். பிறகு , ரமேஷ் கொலைசெய்யப்பட்ட இடத்தை அவர்கள் பார்வையிட்டனர்.

தொடர்ந்து, தற்கொலைசெய்த பா.ஜ.க பெண் நிர்வாகி ராஜராஜேஸ் வரியின் வீட்டுக்கு சென்ற குழுவினர், அவரது குடும்பத்தினருக்கும் ஆறுதல்கூறினர்.

இதைதொடர்ந்து , மரவனேரியில் உள்ள ஆர்எஸ்எஸ். அலுவலகத்தில் பா.ஜ.க, ஆர்எஸ்எஸ். நிர்வாகிகளுடன் மூவரும் ஆலோசனைநடத்தினர்.

முன்னதாக, பிரகாஷ் ஜவடேகர் சேலத்தில் செய்தியாளர்களிடம் கூறியது: ஆடிட்டர் ரமேஷின் கொலை பாஜக தலைவர்களை பெரும் அதிர்ச்சிக்குள்ளாக்கியுள்ளது.

இது போன்ற தாக்குதல்களில் பாதிக்கப் பட்டவர்களின் குடும்பத்தினரை சந்தித்தும், விசாரணை அதிகாரிகளிடம் ஆலோசனை நடத்தியபிறகும் அது குறித்த அறிக்கையை பா.ஜ.க மேலிடத்துக்கு வழங்குவோம். குழுவின் அறிக்கை வருகிற 29-ஆம் தேதி சமர்ப்பிக்கப் படும். மேலும், இந்தவிவகாரத்தை நாடாளுமன்ற மழைக்கால கூட்டத்தொடரில் எழுப்புவோம் என்றார் அவர்.