மக்களவை எதிர் கட்சி தலைவர் பதவியை யாருக்கு அளிப்பது என்பதுகுறித்து நாடாளுமன்ற கூட்டத்தொடர் தொடங்கும் ஜூன் 4க்கு முன்பாக முடிவு செய்யப்படும் என நாடாளுமன்ற விவகாரங்கள் துறை இணை அமைச்சர் பிரகாஷ்ஜாவேத்கர் தெரிவித்துள்ளார்.

நாடாளுமன்ற தேர்தலில் ஏற்பட்ட படு தோல்வி காரணமாக மக்களவையில் காங்கிரஸ்க்கு 44 உறுப்பினர்கள் மட்டுமே உள்ளனர். எதிர்கட்சி அந்தஸ்து பெறுவதற்கு தேவையான குறைந்த பட்ச 55 உறுப்பினர்கள் எண்ணிக்கை எந்தகட்சிக்கும் இல்லாத காரணத்தால் அந்தபதவி யாருக்காவது வழங்கப்படுமா அல்லது ராஜிவ் காந்தி பிரதமராக பதவியேற்ற காலகட்டத்தில் யாருக்கும் வழங்கப்படாததுபோல் காலியாக இருக்குமா என்ற கேள்விக் குறி எழுந்துள்ளது. இந்த விவகாரத்தில் காங்கிரசைபோல் அல்லாமல் பெருந்தன்மையாக நடந்து கொள்வோம் என நாடாளுமன்ற விவகாரங்கள் துறை அமைச்சர் வெங்கய்யா நாயுடு தெரிவித்துள்ளார்.

இருப்பினும் மக்களவை எதிர்கட்சி தலைவர் விவகாரம்குறித்து இன்னும் முடிவு எடுக்கவில்லை என சில தினங்களுக்கு முன்பு அறிவித்தார். இந்நிலையில் நாடாளுமன்ற கூட்டத்தொடர் வரும் 4ம் தேதி தொடங்க இருக்கிறது. இந்த கூட்டதொடரில் சபாநாயகர் தேர்வு செய்யப்பட இருக்கிறார். சபாநாயகராக தேர்ந்தெடுக்கப்பட்டவரை பிரதமரும், எதிர்கட்சி தலைவரும் அவர் இருக்கையில் அழைத்துசென்று அமர வைப்பது மரபு. இது குறித்து நாடாளுன்ற விவகாரங்கள் துறை இணை அமைச்சராக நேற்று பொறுப்பு ஏற்றுக்கொண்ட பிரகாஷ் ஜாவேத்கரிடம் செய்தியாளர்கள் கேள்வி எழுப்பினர். ஜூன் 4க்கு முன்பாக எதிர்கட்சி தலைவர்பதவி குறித்து முடிவு எடுக்கப்படும் என ஜாவேத்கர் தெரிவித்தார். அநேகமாக காங்கிரஸ் கட்சிக்கே எதிர் கட்சி தலைவர் பதவி வழங்கப்படும் என டெல்லி வட்டாரங்கள் தெரிவித்தன. நாடாளுமன்ற விவகாரங்கள் துறை இணை அமைச்சராக பொறுப்பேற்றுள்ள பிரகாஷ் ஜாவேத்கருக்கு மாநிலங்கள் அவை பொறுப்பை வெங்கய்யா நாயுடு ஒதுக்கியிருப்பது குறிப்பிடத்தக்கது.