பிரதமர் நரேந்திர மோடியை விமர்சிப்பதற்கு தமிழ்நாடு காங்கிரஸ் தலைவர் ஈவிகேஎஸ் இளங்கோவனுக்கு எந்த தகுதியோ, அருகதையோ இல்லை என மத்திய அமைச்சர் பொன். ராதாகிருஷ்ணன் தெரிவித்துள்ளார்.

சென்னையில் செய்தியாளர்களிடம் இது குறித்து மேலும் அவர் கூறியதாவது:- நிலம் கையகப்படுத்தும் மசோதாவால் இந்தியாவில் உள்ள எந்த விவசாயிக்கும் பாதிப்பு ஏற்படாது. கையகப் படுத்தப்படும் நிலத்திற்கு உரியதொகைகளை மத்திய அரசு நிச்சயம் வழங்கும்.

ஒருமடங்கிற்கு நான்கு மடங்கு தொகை தருவதற்கும் மத்திய அரசு தயார் நிலையில் உள்ளது. இந்த மசோதா சட்டமாக்கப் படுவதன் மூலம் இந்தியாவில் தொழில்வளம் பெருகும். விவசாயிகள், வர்த்தகர்கள் உட்பட அனைத்துபிரிவு மக்களுக்கும் பயனளிக்கக்கூடிய நல்ல சட்டம்தான் நிலம் கையகப்படுத்தும் சட்டம் என்பதை மக்கள் புரிந்து கொண்டிருக்கிறார்கள்.

ஆனால், சில எதிர் கட்சிகள் தான் தேவையில்லாமல் அரசியலுக்காக இந்த சட்டத்திற்கு எதிராக கூச்சலிடுகிறார்கள். இது சரியல்ல.தமிழ்நாடு காங்கிரஸ் கமிட்டி தலைவர் ஈவிகேஎஸ் இளங்கோவன் பொறுப் பேற்ற நாள் முதல் பாஜக.,வுக்கும் , பிரதமர் நரேந்திர மோடிக்கும் எதிராக பொறுப்பற்ற முறையில் பேசிவருகிறார். மோடியை விமர்சிப்பதற்கான தகுதியோ, அருகதையோ இளங்கோவனுக்கு இல்லை.

இளங்கோவன் போன்று தரம்தாழ்ந்த அரசியலை பிஜேபி ஒருபோதும் நடத்தாது. அப்படிப்பட்ட அரசியலை மக்களும் விரும்பமாட்டார்கள். தமிழ்நாட்டில் பக்கிங்ஹாம் கால்வாயில் இருந்து மாமல்லபுரம் வரையிலும் நீர்வழி போக்குவரத்தை தொடங்க திட்டமிடப் பட்டுள்ளது.

மத்திய அரசு இதற்கான அனைத்து பூர்வாங்க பணி களையும் முடித்துள்ளது. விரைவில் திட்டப்பணிகள் தொடங்கப்படும். 2016-ல் நடைபெறும் தமிழக சட்டப்பேரவை தேர்தலில் யாருடன் கூட்டணி என்பதை பாஜக தலைமைதான் முடிவுசெய்யும் என்றார்.