பிரதமர் மோடி தலைமையிலான மத்திய அரசு, சரியானதிசையில் சென்று கொண்டிருப்பதாக பாஜக மூத்த தலைவர் அத்வானி பாராட்டி உள்ளார்.

குஜராத் மாநிலத்தில் உள்ளாட்சி தேர்தல் நேற்று நடைபெற்றது. ஆமதாபாத் மாநகராட்சி தேர்தலில் கான்பூர்பகுதியில் அமைந்துள்ள வாக்குச்சாவடியில் அத்வானி நேற்று ஓட்டுபோட்டார்.

அதைத்தொடர்ந்து அவர் நிருபர்களுக்கு பேட்டி அளித்தார். அப்போது அவர் கூறுகையில், ‘‘பாராளுமன்ற தேர்தல், சட்ட சபை தேர்தல் போன்று உள்ளாட்சி தேர்தல்களும் முக்கியத்துவம் வாய்ந்தவை தான். இந்த முறை இங்கு உள்ளாட்சி தேர்தலில் 50 சதவீத இடங்கள் பெண்களுக்கு ஒதுக்கப் பட்டுள்ளன’’ என்றார். பின்னர் நிருபர்களின் கேள்விக்கு அவர் அளித்த பதில்

கேள்வி:– நல்லகாலத்தை கொண்டு வருவோம் என்று பாராளுமன்ற தேர்தலின் போது அளித்த வாக்குறுதியை, குறிப்பாக விலைவாசியை குறைப்போம் என்று கூறியதை, மோடி அரசு நிறைவேற்ற தவறிவிட்டதா? பருப்பு விலை கிலோ ரூ.200 அளவுக்கு உயர்ந்ததே?

பதில்:– எந்த ஒரு நிர்வாகத்துக்கும், எதையும் செய்து முடிப்பதற்கு ஒரு காலஅவகாசம் வேண்டும் என்று நான் நம்புகிறேன். அரசாங்கம் சரியான திசையில் சென்று கொண்டிருக்கிறது. எனவே நல்லசாதகமான முடிவுகள் வரும் என்று நம்புகிறேன்.

கேள்வி:– உள்ளாட்சி தேர்தல்களில் முடிவு எப்படிஅமையும்?

பதில்:– இதற்கு முன்னர் நரேந்திர மோடி தலைமையில் சட்ட சபை தேர்தலிலும், பாராளுமன்ற தேர்தலிலும் கட்சி நல்லதொரு வெற்றி பெற்றிருக்கிறது. அதேபோன்ற முடிவுகள் உள்ளாட்சி தேர்தலிலும் எதிரொலித்தால் நான் மகிழ்ச்சிஅடைவேன்.

கேள்வி:– பீகாரில் தோல்வி அடைந்துள்ள நிலையில் இந்ததேர்தல் (குஜராத் உள்ளாட்சி தேர்தல்) பாரதீய ஜனதாவுக்கு வெற்றிதேடித்தரும் என்று எப்படி கூறுகிறீர்கள்?

(பீகார் தேர்தலுக்கு பின்னர்) கட்சியில் விழிப்புநிலை அதிகரித்திருக்கிறது என்று என்னால் சொல்லமுடியும். தேர்தல் முடிவுகள் எங்களுக்கு சாதகமானதாக அமைவதற்கு ஏற்ற அனைத்து முயற்சிகளும் செய்யப் பட்டுள்ளன. இந்த முயற்சிகள் தேர்தல் முடிவுகளில் எதிரொலிக்கும்.

இவ்வாறு அவர் பதில் அளித்தார்.