இந்தியாவின் முதல் புல்லட்ரயில் திட்டம் பிரதமர் நரேந்திர மோடி, ஜப்பான் பிரதமர் ஷின்ஜோ அபே முன்னிலையில் நேற்று  கையெழுத் தானது. மேலும், சிவில் அணு சக்தி ஒப்பந்தம், பாதுகாப்பு துறை தளவாடங்களை பகிர்ந்துகொள்ளுதல் உள்ளிட்ட முக்கிய ஒப்பந்தங்களும்  கையெழுத்தாகின.

ஜப்பான் பிரதமர் ஷின்சோ அபே 3 நாள் அரசுமுறை பயணமாக இந்தியா வந்துள்ளார்.  இரு தலைவர்களும் இந்தியா-ஜப்பான் வர்த்த தலைவர்கள் மாநாட்டில்  பங்கேற்றனர். இந்தமாநாட்டில் பிரதமர் மோடி பேசியதாவது:

மேக் இன் இந்தியா’ திட்டம் இந்தியாவில் மட்டுமல்ல, ஜப்பானிலும் ஒருஇயக்கமாக  செயல்படுத்தப்படுகிறது. ஜப்பான் நிறுவனமான சுசுகி இந்தியாவில் கார்களை தயாரித்து அந்நாட்டுக்கு ஏற்றுமதிசெய்ய இருக்கிறது.
இதற்காக ஜப்பான் அரசு 11-12 பில்லியன் அமெரிக்க டாலர்கள் நிதி ஒதுக்கீடு செய்துள்ளதாக தெரிவிக்கப் பட்டுள்ளது. இது, இரு நாடுகளும் இணைந்து  முன்னோக்கி செல்வதை காட்டுகிறது.

உலகளவில் மந்தமான பொருளாதார நிலை நிலவும் நிலையில் இந்தியா, ஜப்பான் பொருளாதார நிலை ஊக்குவிப்பதாக இருக்கிறது. கடந்தமுறை ஜப்பான் பயணம் சென்றபோது, அந்நாட்டு அரசு 45 பில்லியன் அமெரிக்க டாலர் மதிப்பிலான முதலீடுகளை இந்தியாவில்  மேற்கொள்வதற்கு ஒப்புக்கொண்டது.

இவ்வளவு அதிகமானதொகை பலருக்கு ஆச்சரியத்தை ஏற்படுத்தியிருந்த நிலையில், தற்போது குறுகிய  காலகட்டத்தில், அதற்கான ஆயத்தப்பணிகள் நடைபெற்று வருவது கண் கூடாக தெரிகிறது. அதிவேக புல்லட் ரயில்களை இயக்குவதில் மட்டும்  இந்தியாவும் ஜப்பானும் ஒருங்கிணைந்து செயல் பட்டால் போதாது வளர்ச்சி பாதையில் முன்னேறி செல்வதிலும் இரு நாடுகளும் ஒருங்கிணைந்து  செயல்படவேண்டும். இவ்வாறு பிரதமர் மோடி கூறினார்.