தென்கிழக்கு ஆசிய நாடுகளுடன் வர்த்தகத்தொடர்பு ஏற்படுத்திக் கொள்ள வடகிழக்கு பகுதியை வர்த்தக கேந்திரமாக உருவாக்க மத்திய அரசு விரும்புகிறது என மத்திய உள்துறை அமைச்சர் ராஜ்நாத்சிங் தெரிவித்தார்.
 

அஸ்ஸாம் ரைஃபிள்ஸ் படை உருவாக்கப்பட்டு 180 ஆண்டுகள் நிறைவடைந்ததையொட்டி, மேகாலயா தலை நகர் ஷில்லாங்கில் உள்ள அந்தப்படையின் தலைமையகத்தில் திங்கள், செவ்வாய் ஆகிய இருநாள்கள் விழா நடைபெற்றது.

 அதில் கலந்துகொண்டு ராஜ்நாத் சிங் செவ்வாய்க்கிழமை பேசியதாவது:

 இந்தியா சுதந்திரம்பெற்று 70 ஆண்டுகள் ஆகியும் வடக்கு கிழக்கு பகுதிகள் அடையவேண்டிய வளர்ச்சி, இதுவரை ஏற்படவில்லை. வடகிழக்குப் பகுதிகளின் அதிவேக வளர்ச்சிக்கே எங்கள் அரசு முன்னுரிமை அளிக்கிறது.
 எந்தவொரு பகுதியும் வளர்ச்சி யடைய வேண்டுமெனில், போக்குவரத்துவசதி என்பது அத்தியாவசியமான ஒன்றாகும். இதனால்மட்டுமே தொடர்புகள் மேம்படுத்தப்பட்டு எல்லை தாண்டிய வர்த்தகம் மேலும் அதிகரிக்க வழிவகுக்கும்.

 தென் கிழக்கு ஆசிய நாடுகளுடன் வர்த்தக தொடர்பு ஏற்படுத்திக்கொள்ள வடகிழக்கு பகுதியை வர்த்தக கேந்திரமாக உருவாக்க வேண்டும். அதற்கு அப்பகுதிகளில் அமைதி நிலவவேண்டியது கட்டாயமான ஒன்றாகும்.
 

இந்தியா- மியான்மர் எல்லையில் கடந்தகாலங்களில் அஸ்ஸாம் ரைஃபிள்ஸ் படைகள் மிகவும் சிறப்பாக பணியாற்றியது போல், தற்போது வடகிழக்குப் பகுதிகளில் அமைதியை உறுதிப்படுத்தவும் முக்கிய பங்காற்ற வேண்டும்.

கொடூர செயல்கள் மூலம் இந்தியாவை சீர்குலைக்க பல்வேறு தீய சக்திகள் முயற்சித்து வருகின்றன. அவர்களின் செயல்களை நமது ராணுவப்படைகள் முறியடித்து வருகின்றன. அதைப்போல, வடகிழக்கு பகுதிகளில் செயல்படும் தீய சக்திகளை அஸ்ஸாம் படைகளாகிய நீங்கள் வீழ்த்த வேண்டும்.

 வன்முறையை கைவிட எண்ணும் பயங்கரவாத அமைப்புகளுடன் அரசு பேச்சு வார்த்தை நடத்த தயாராக உள்ளது. எனவே யாரும் வன்முறையை கையில் எடுக்கவேண்டாம் என்பதே என் வேண்டுகோள் .  அஸ்ஸாம் ரைஃபிள்ஸ் படைப்பிரிவுகளில் பெண்களை பணியமர்த்தும் முயற்சியைத் தொடங்கியது பாராட்டுக்குரியது என்றார் ராஜ்நாத் சிங்.