மத்தியில் பா.ஜ.க ஆட்சிக்குவந்தால் மீனவர்களுக்கு என தனியாக அமைச்சகம் உருவாக்கப்படும் என்று மக்களவை எதிர் கட்சித் தலைவர் சுஷ்மாஸ்வராஜ் தெரிவித்துள்ளார் .

இலங்கை கடற்படையினர் தமிழக மீனவர்கள் மீது தாக்குதல் நடத்தி சிறை பிடிப்பதைக் கண்டித்து பாஜக.,வின் தமிழக மீனவரணி சார்பில் மக்களவை எதிர்க் கட்சித் தலைவர் சுஷ்மா ஸ்வராஜ் தலைமையில் கடல்தாமரை போராட்டம் பாம்பனில் நடைபெற்றது.

இதில் கலந்து கொண்டு சுஷ்மா ஸ்வராஜ் பேசியதாவது;

”இந்த ஆண்டு சாகித்ய அகாடமிவிருது, தமிழக மீனவ சமுதாயத்தை சார்ந்த ஜோ.டி.குருஸ் பெற்றிருக்கிறார். அவருக்கு முதலாவதாக எனது பாராட்டை தெரிவித்துக் கொள்கின்றேன்.

நம் இந்தியநாடு நீண்ட கடற் கரைகளைப் பெற்றநாடு. நம் நாட்டில் குட்டைகளில், ஆறுகளில், கடல்களில் மீன் பிடிக்கும் மீனவர்கள் என பல்வேறுதரப்பினர் உள்ளனர். அவர்களது பிரச்சினைகளும் தனித் தனியாக உள்ளது. அவற்றை நாம் தனித் தனியாக அணுகவேண்டும். அதேசமயம் இந்த மீனவர்கள் அனைவரும் வறுமையில் வாடுகிறார்கள். கல்வியிலும் பின் தங்கி இருக்கின்றார்கள்.

குஜராத்மாநில மீனவர்கள், பாகிஸ்தான் மீனவர்களால் சிறைப் பிடிக்கப்படுகிறார்கள். அதுபோல தமிழக மீனவர்கள், இலங்கை கடற் படையினரால் இது வரையிலும் 600க்கும் மேற்பட்டவர்கள் கொல்லப் பட்டிருக்கின்றார்கள்.

நான் இலங்கைக்கு இந்தியப் பிரதிநிதிகளுடன் கூட்டாக சென்ற போது, அந்நாட்டு அதிபர் ராஜபக்சேவிடம் இந்தியமீனவர்கள் மீது இலங்கை கடற்படை தாக்குதல் நடத்தக் கூடாது என்று கேட்டுக்கொண்டேன். அவரும் இலங்கை கடற்படையிடம் இந்தியமீனவர்கள் மீது தாக்குதல் நடத்தக்கூடாது என்று அறிவுறுத்துகிறேன் என்றார் . ஆனால் அதை அவர் கடைப்பிடிக்கவில்லை.

இந்தக் கூட்டத்தில் கணவனை இழந்த விதவை பெண்களை நான் பார்கின்றேன். மகனை இழந்த தாய்மார்களை பார்க்கின்றேன். நேற்றுகூட 38 மீனவர்களை இலங்கை கடற்படையினர் சிறைப் பிடித்தாக அறிகிறேன்.

இந்தியா முழுவதும் உள்ள மீனவர்களின் பிரச்சினைகள் பற்றி அறிய பாஜக சார்பில் பல்வேறுகுழுக்களை அமைத்து அவற்றை அறிக்கையாக பா.ஜ.க தேசிய பொதுசெயலாளர் முரளிதர் ராவ் முயற்சியில் வெளியிடப்பட்டுள்ளது. ஆங்கிலத்தில் உள்ள அந்த அறிக்கையை  தமிழில் வெளியிடவேண்டும்.

பாஜக ஆட்சிக்குவந்தால் மீன் வளத்துறை உருவாக்கி, அதற்கு தனி அமைச்சர் நியமிக்கப்படுவார். இலங்கை தமிழர் பிரச்சினை, இந்தியப் பிரதமரால்தான் தீர்க்க முடியும். எனவே வலிமையான பாரதத்தை உருவாக்க பா.ஜ.க.,வுக்கு வரும் மக்களவை தேர்தலில் வாக்களியுங்கள்” என்றார்.

பின்னர் மக்களைவை எதிர்கட்சித் தலைவர் சுஷ்மா ஸ்வராஜ் மகனை இழந்த, கணவனை இழந்த மீனவத் தாய்மார்களை சந்தித்து ஆறுதல் கூறினார்.