நடைமுறையில் உள்ள அனைத்து வரிகளையும் ரத்து செய்து விட்டு பரிவர்த்தனை வரியை அறிமுகப்படுத்த வேண்டும், பரிவர்த்தனை வரியை அறிமுகப்படுத்தினால் ஆண்டுக்கு ரூ.40 லட்சம்கோடி வரை வருமானம் கிடைக்கும். என பா.ஜ.க தலைவர் நிதின்கட்காரி வலியுறுத்தியுள்ளார்.

தேசியவங்கி தொழிலாளர்கள் அமைப்பின் பொன் விழா ஆண்டு நாக்பூரில் நடைபெற்றது. இந்நிகழ்ச்சியில் பா.ஜ.க தலைவர் நிதின்கட்காரி சிறப்பு விருந்தினராக கலந்துகொண்டு பேசினார். அவர் பேசியதாவது:–

நாட்டில் தற்போது 34 வரிகள் நடை முறையில் இருக்கின்றன. இதன் மூலம் ஆண்டுக்கு ரூ.14 லட்சம்கோடி வருமானம் கிடைக்கிறது. ஆனால் இந்தவரிகளை எல்லாம் ரத்து செய்து விட்டு, பரிவர்த்தனை வரியை அறிமுகப்படுத்தினால் ஆண்டுக்கு ரூ.40 லட்சம்கோடி வரை வருமானம் கிடைக்கும்.மத்தியில் பா.ஜ.க ஆட்சிக்குவந்தால் ஊழலை வேரறுப்போம். மேலும் நிர்வாகம், நீதித் துறை, வரிவிதிப்பு, போலீஸ் எந்திரங்கள் மற்றும் கல்வி ஆகியவற்றின் சீர்திருத்தங்களில் பா.ஜ.க கவனம் செலுத்திவருகிறது. மேலும் பா.ஜ.க ஒரு தொலைநோக்கு ஆவணத்தை தயார்செய்து வருகிறது. படித்து முடித்து நல்ல சம்பளத்தில் வேலை பார்க்கும் இளைஞர்கள் கூட தங்களது வேலைகளை உதறி தள்ளிவிட்டு எங்களுடன் இணைந்து கட்சிபணி ஆற்றி வருகிறார்கள்.

ஆகையால் தகுதியும், திறமையும் உடைய வங்கிஊழியர்கள் தங்களது நேரத்தை வீணாக கழிக்கவேண்டாம். 20 ஆண்டுகள் சேவைக்குப்பின் அவர்கள் விருப்ப ஓய்வுபெற்று சமூக சேவையில் ஈடுபட வேண்டும். வங்கித்துறை நெருக்கடிக்கு மத்தியில் நகர்ந்து கொண்டிருக்கிறது. ஒவ்வொரு ஊழியர்கள் மீதும் எங்களுக்கு அக்கறை உண்டு. ஊதியஉயர்வு மற்றும் போனஸ் ஆகிய காரணங்களுக்காக மட்டுமே அவர்கள் போராட்டம் நடத்துகிறார்கள்.இவ்வாறு நிதின் கட்காரி தெரிவித்தார்.