பாஜக 300க்கும் அதிகமான தொகுதிகளில் வென்று தனிப் பெரும் பான்மையுடன் மத்தியில் ஆட்சியமைக்கும் என பாஜக மூத்த தலைவர் எம்.வெங்கய்ய நாயுடு நம்பிக்கை தெரிவித்துள்ளார்.

ஹைதராபாதில் செய்தியாளர்களுக்கு சனிக் கிழமை பேட்டியளிக்கையில் அவர் இதை தெரிவித்தார். அவர்மேலும் கூறியதாவது:

“”சீமாந்திரம் மற்றும் தெலங்கானாவில் பா.ஜ.க-தெலுங்கு தேசம் கூட்டணிக்கு நல்ல வெற்றிவாய்ப்பு உள்ளது. எனவே மத்தியிலும் மாநிலங்களிலும் இந்த கூட்டணி ஆட்சியைபிடிக்கும் என்ற நம்பிக்கை இருக்கிறது.

எங்களுக்கு 300க்கும் அதிகமான மக்களவை தொகுதிகளில் வெற்றிகிடைக்கும் என்பதால்  நாங்கள் வேறுகட்சிகளின் உதவியை பெற்றுத்தான் மத்தியில் ஆட்சி அமைக்கவேண்டும் என்ற நிலைவராது. தமிழக முதல்வர் ஜெயலலிதா தலைமையிலான அதிமுக போன்ற கட்சிகள் நாங்கள் ஆட்சியமைக்க ஆதரவு தர தயார் என்றால் அந்த ஆதரவை ஏற்போம். தாமாகமுன்வந்து எங்களை ஆதரிப்பவர்கள் யாராக இருந்தாலும் அதை நாங்கள் தடுக்க மாட்டோம். அதேசமயம் நாங்களாக சென்று யாரிடமும் ஆதரவு கேட்கமாட்டோம். ஏனெனில் அந்தநிலை எங்களுக்கு ஏற்படாது என நாங்கள் உறுதியாக நம்புகிறோம்.

பாஜக பிரதமர் வேட்பாளர் நரேந்திரமோடி போட்டியிடும் வாராணசி தொகுதியில் என்ன நடக்கிற்து என்பதை அறிய உலகநாடுகள் பலவற்றில் உள்ளவர்கள் ஆவலாக இருக்கின்றனர். அப்படியிருக்கும்போது மோடி பிரசாரபேரணி நடத்த தேர்தல் ஆணையம் அனுமதிமறுத்தது பாரபட்சமான செயல். மற்ற கட்சிகளுக்கு அத்தகைய அனுமதி தரும்போது எங்களுக்கு தர மறுப்பது என்ன நியாயம்?” என்றார் வெங்கய்ய நாயுடு.