கூட்டணிகளுக்கோ, கூட்டணி ஆட்சிக்கோ எங்கள் அரசு முக்கியத் துவம் அளிக்காது. மாறாக, நாட்டின் பாதுகாப்புக்கே முன்னுரிமை அளிப்போம் என மத்திய உள்துறை அமைச்சர் ராஜ்நாத் சிங் தெளிவுபடுத்தியுள்ளார்.

காஷ்மீரை ஆளும் பாஜக.-பி.டி.பி. கூட்டணி அரசின் முதல்மந்திரியான முப்தி முகமது சயித் தலைமையிலான ஆட்சியில் ஹுரியத் இயக்க தலைவர்களை சிறையிலிருந்து விடுவித்தது பெரும் சர்ச்சையை கிளப்பியுள்ளது.

இந்நிலையில், உத்தரப் பிரதேசம் மாநிலம், காசியாபாத்தில் இன்று நடைபெற்ற மத்திய தொழில்பாதுகாப்பு படை தொடர்பான நிகழ்ச்சியின் போது செய்தியாளர்களுக்கு பேட்டியளித்த மத்திய உள்துறை அமைச்சர் ராஜ்நாத் சிங் கூறியதாவது:-

எந்த காரணத்துக்காகவும் நாட்டின் பாதுகாப்பில் எனது அரசு சமரசம் செய்துகொள்ளாது. எங்களை பொருத்தவரையில் கூட்டணி அரசாங்கமோ அல்லது தனிக்கட்சி அரசாங்கமோ.., அது எங்களுக்கு முன்னுரிமையான பிரச்சனை அல்ல. நாடும் நாட்டின் பாதுகாப்புமே எங்களது முன்னுரிமை என்ற எங்களது நோக்கத்தை நீங்கள் புரிந்துகொள்ள வேண்டும்.

நேற்று, பாராளுமன்றத்தில் தெரிவித்த அதேகருத்தை மீண்டும் தெளிவுப்படுத்த விரும்புகிறேன். ஆட்சி எங்களுக்கு முக்கியமல்ல; நாடுதான் எங்களுக்கு மூலமுதல் முக்கியத்துவம் வாய்ந்தது. எனது இந்தகருத்தில் எல்லா விவகாரங்களுமே உள்ளடக்கமாகி இருக்கின்றன. இந்த உண்மையை நீங்கள் புரிந்துகொள்ள வேண்டும்.

இந்த விவகாரத்தைப் (ஹுரியத் இயக்க தலைவர்களை சிறையில் இருந்து விடுவித்தது) பொருத்தவரை நான் இப்போதைக்கு எதுவும் சொல்வதற்கில்லை. ஜம்முகாஷ்மீர் மாநில அரசு இதுதொடர்பாக வெளிப்படுத்தியுள்ள கருத்து எனக்கு திருப்தியாக இல்லை. இதுதொடர்பாக மேலும் சில தகவல்கள், விளக்கங்கள் தேவை என காஷ்மீர் அரசிடம் கேட்டிருக்கிறேன். அவை கிடைத்தபின்னரே நான் கருத்து தெரிவிக்க முடியும் என்றார் .