வேளச்சேரி ராமச்சந்திர நாடாரின் முதலாண்டு நினைவு நாளை யொட்டி வேளச்சேரியில் உள்ள அவரது இல்லத்தில் மணிமண்டபம் மற்றும் திருவுருவ சிலை அமைக்கப்பட்டுள்ளது. இதன் திறப்புவிழா நடந்தது.

விழாவில் மத்திய அமைச்சர் பொன்.ராதாகிருஷ்ணன் கலந்துகொண்டு மணி மண்டபம் மற்றும் ராமசந்திர நாடாரின் சிலையை திறந்துவைத்தார்.

பின்னர் அவர் செய்தியாளர்களிடம் பேசியதாவது; மெட்ரோ ரெயில் திட்டம் மத்திய, மாநில அரசுகளின் கூட்டுமுயற்சியால் உருவான திட்டம். இதன் தொடக்கவிழா அழைப்பிதழில் கண்டிப்பாக பிரதமரின் படம் பிரசுரித்திருக்க வேண்டும்.

ஆனால், பிரசுரிக்கப்படவில்லை. தொடக்க விழாவில் கலந்துகொள்ள எனக்கும் அழைப்பிதழ் அனுப்ப வில்லை. இதுகுறித்து கருத்து கூற விரும்பவில்லை.

மெட்ரோ ரெயில் கட்டணம் மற்ற மாநிலங்களைவிட சென்னையில் கூடுதலாக உள்ளது. இதனை குறைக்க மாநில அரசு முயற்சிக்கவேண்டும்.

முல்லை பெரியாறு அணை பாதுகாப்புபணியில் தமிழக போலீசாரை நிறுத்த வேண்டாம். இந்த அணை இருமாநிலங்களுக்கும் சொந்தமானது. பிரச்சினை ஏற்படும்போது மட்டும் மத்தியபோலீஸ் படையை நிறுத்த வேண்டும் என்று அவர் கூறினார்.