எல்லை கட்டுப்பாட்டுக்கோடு வழியாக இந்தியாவுக்குள் ஊடுருவி ஜம்மு-காஷ்மீரில் தாக்குதல் நடத்துவதற்கு 100 பயங்கர வாதிகளை பாகிஸ்தான் ராணுவம் தயார்படுத்தி யிருப்பதாகத் தகவல்கள் தெரிவிக்கின்றன.
பாகிஸ்தான் ஆக்கிரமிப்பு காஷ்மீரில் உள்ள பயங்கரவாத முகாம்கள்மீது இந்திய ராணுவத்தினர் கடந்த 29-ஆம் தேதி நடத்திய அதிரடிதாக்குதலுக்கு பதிலடி கொடுப்பதற்காக, பாகிஸ்தான் ராணுவம் தயாராகியுள்ளதாகக் கூறப்படுகிறது.

பாதுகாப்பு விவகாரங் களுக்கான அமைச்சரவை கூட்டம், தில்லியில் புதன் கிழமை நடைபெற்றது. பிரதமர் நரேந்திரமோடி தலைமையில் நடைபெற்ற இந்தக்கூட்டத்தில், மத்திய உள்துறை அமைச்சர் ராஜ்நாத் சிங், பாதுகாப்புத் துறை அமைச்சர் மனோகர் பாரிக்கர், வெளியுறவுத்துறை அமைச்சர் சுஷ்மா ஸ்வராஜ், தேசியப் பாதுகாப்பு ஆலோசகர் அஜித் தோவால் உள்ளிட்டோர் கலந்துகொண்டனர்.

இந்த கூட்டத்தில் விவாதிக்கப்பட்ட விஷயங்கள் குறித்து மத்தியஅரசு வட்டாரங்கள் தெரிவித்ததாவது:
இந்திய ராணுவத்தின் அதிரடி தாக்குதலுக்கு பதிலடிகொடுக்கும் வகையில், ஜம்மு-காஷமீர் மாநிலத்துக்குள் ஊடுருவி தாக்குதல் நடத்துவதற்காக, பத்துக்கும்மேற்பட்ட பயங்கரவாத முகாம்களை பாகிஸ்தான் ராணுவம் தயார்நிலையில் வைத்திருப்பதாக, மத்திய அமைச்சர்களிடம் அஜித்தோவால் கூறினார்.

உளவுத் துறை அளித்திருக்கும் அந்தத் தகவல்படி, காஷ்மீருக்குள் சுமார் 100 பயங்கரவாதிகளை ஊடுருவச்செய்து, அங்குள்ள பாதுகாப்பு மற்றும் ராணுவமுகாம்கள் மீதும், குறிப்பிட்ட சில பொது இடங்கள் மீதும் தாக்குதல் நடத்துமாறு அவர்களுக்கு பாகிஸ்தான் ராணுவம் அறிவுறுத்தியிருப்பதாகவும் அஜித்தோவால் கூறினார்.
அதையடுத்து, எல்லை பகுதியில் பாதுகாப்பை பலப்படுத்து வதற்கான நடவடிக்கைகளை மத்திய அரசு துரிதப் படுத்தியுள்ளது. மேலும், ஸ்ரீநகர் விமான நிலையத்தில் சுகோய் ரக போர்விமானத்தை இந்திய ராணுவம் நிறுத்தி வைத்திருப்பதாக தகவல்கள் தெரிவிக்கின்றன.