அதிமுக-பாஜக உறவு தாய்குழந்தை உறவுபோல் இருப்பதாக நான் சொல்ல வில்லை என, தமிழக பாஜக தலைவர் தமிழிசை சவுந்தர ராஜன் தெரிவித்துள்ளார்.

சென்னை தியாகராய நகரில் சனிக்கிழமை செய்தியாளர்களைச் சந்தித்த தமிழிசை சவுந்தர ராஜன், “ஜிஎஸ்டியில் அதிக வருமானம் கிடைத்த மாநிலங்களின் பட்டியலில் தமிழகம் நான்காவது இடத்தை பிடித்துள்ளது. ஜி.எஸ்.டி திட்டத்தை எதிர்த்த புதுச்சேரி முதல்வர் நாராயண சாமி கூட அத்திட்டத்தின் மூலம் 1,400 கோடி ரூபாய் வருமானம் கிடைத் திருக்கிறது என சொல்லியிருக்கிறார்.

எவ்வளவு பெரிய பொருளாதார சீர்திருத்தத்தை மத்திய அரசு கொண்டுவந்திருக்கிறது என்பதைத்தான் பார்க்க வேண்டும் என்பது என்னுடைய கருத்து. என்னைப் பொறுத்தவரை தமிழகமக்களுக்கு நல்லது நடக்க வேண்டும். இன்னும் ஓராண்டுக்குள் பல நல்லதிட்டங்கள் வரவிருக்கின்றன. நல்ல திட்டங்களை நாம் எதிர்பார்க்கவேண்டும்.

அதிமுக-பாஜக உறவு தாய்குழந்தை உறவு போல் இருப்பதாக நான் சொல்லியதாக ஊடகங்களில் செய்திகள் வந்திருக்கின்றன. நான் அப்படி சொல்லவில்லை. ஒரு அமைச்சர் அப்படி சொல்லியதாக என்னிடம் செய்தியாளர்கள் கேள்வி எழுப்பினர். அதற்கு மத்தியில் பாஜக ஆட்சிசெய்கிறது, மாநிலத்தில் அதிமுக ஆட்சி செய்கிறது. உறவுசுமுகமாக இருந்தால் தான் நல்ல திட்டங்களை மாநிலத்திற்கு கொண்டுவர முடியும் என்று தான் நான் கூறினேன்.

ஏனென்றால், கூட்டணி கட்சியாக காங்கிரஸுடன் திமுக இருந்த போது கூட தமிழகத்திற்கு நல்ல திட்டங்களை கொண்டுவர முடியவில்லை. ஆனால், கூட்டணிக் கட்சியாக இல்லாத போதும் கூட நல்ல உறவை மேம்படுத்திக் கொண்டால் மக்களுக்கான நல்லதிட்டங்கள் வரும் என்றுதான் நான் சொன்னேன்” என தமிழிசை தெரிவித்தார்.