தமிழக மீனவர்கள் பிரச்சினை சுமூகமாக தீர்க்கப்படும் மத்தியில் ஆட்சி நடத்துகிற நரேந்திரமோடி ஓர் பிரதமராக செயல்படாமல் இந்திய திருநாட்டின் ஊழியனாக செயல்படுகிறார் என மத்திய அமைச்சர் பொன்.ராதாகிருஷ்ணன் தெரிவித்துள்ளார்.

கன்னியாகுமரி பாராளுமன்றதொகுதி எம்.பி.யும், மத்திய மத்திய மந்திரியுமான பொன்.ராதாகிருஷ்ணன் கடந்த சில தினங்களாக வாக்காளர்களுக்கு நன்றி தெரிவித்து வருகிறார். நேற்று அவர் அகஸ்தீஸ்வரம் ஒன்றியத்தில் வாக்காளர்களுக்கு நன்றி தெரிவித்தார். சுசீந்திரம் தாணுமாலய சுவாமி கோவிலில் சாமி கும்பிட்டுவிட்டு வாக்காளர்களுக்கு நன்றி தெரிவிக்கும் பிரசாரத்தை தொடங்கினார். அப்போது அவர் நிருபர்களிடம் கூறியதாவது:–

மத்தியில் ஆட்சி நடத்துகிற நரேந்திரமோடி ஓர் பிரதமராக செயல்படாமல் இந்திய திருநாட்டின் ஊழியனாக செயல்படுகிறார். இலங்கைக்கும், தமிழக மீனவர்களுக்கும் நடக்கும் பிரச்சினைகளை சுமூகமாக தீர்க்கும்விதத்தில் இரு அரசுகளும் பேசி நல்லதோர் முடிவை விரைவில் மோடி அரசு செயல்படுத்தும்.

மத்திய அரசு தமிழக அரசுடன் நல்லுறவை ஏற்படுத்தி உள்ளது. மத்திய அரசின் நிதிகள் அனைத்தும் எந்தவிதமான பாகுபாடின்றி தமிழக அரசுக்கு வழங்கப்படும்.

முந்தைய காங்கிரஸ் அரசு பல திட்டங்களை செயல்படுத்துவோம் என வாய்மொழியாக கூறிவிட்டு அனைத்து திட்டங்களையும் கிடப்பில்போட்டது. அதுபோல் அல்லாமல் மோடி அரசு தீட்டுகிற திட்டங்கள் அனைத்தும் உடனுக்குடன் மக்களை சென்றடையும் விதத்தில் திட்டங்கள் நடைபெற்று வருகின்றன.

தேசிய நெடுஞ்சாலைகள் சீர் செய்யப்பட்டு கூடுதலாக நாற்கர சாலைகள் அமைக்கப்பட உள்ளது. எந்த பகுதி மக்களுக்கும் சேதம் எதுவும் நிகழாதபடி விரைவில் சுசீந்திரம் பாலம் சீர்செய்யப்படும இவ்வாறு பொன்.ராதாகிருஷ்ணன் கூறினார்