மகாராஷ்டிரத்தில் பாஜக அறுதிப் பெரும்பான்மையுடன் வெற்றிபெறும். இத்தேர்தலில் நாங்கள் முழு நம்பிக்கையுடன் போட்டியிட்டு, வெற்றிபெறுவோம், லோக்பால், மத்திய ஊழல் கண் காணிப்பு ஆணையம் உள்ளிட்ட சட்டப் பூர்வ அமைப்புகளுக்கான நியமனங்களில் மத்திய அரசு விதிமுறைகளின்படி செயல்படும் என உள்துறை அமைச்சர் ராஜ்நாத்சிங் தெரிவித்துள்ளார்.

லோக்பால் உள்ளிட்ட அமைப்புகளுக்கான தலைவர், உறுப்பினர்களை தேர்வுசெய்யும் குழுவில் மக்களவை எதிர்க்கட்சி தலைவரும் இடம்பெற்றிருக்க வேண்டும் என்பது விதி. எனினும், மக்களவையில் தேவையான எம்.பி.க்களின் பலம் காங்கிரஸக்கு இல்லை என்பதால், அக்கட்சிக்கு எதிர்க்கட்சித் தலைவர் பதவி கிடைக்கவில்லை.

இந்நிலையில், லோக்பால் அமைப்புக்கான தலைவர், உறுப்பினர் பதவிக்கான நியமனங்கள் நிலுவையில் இருப்பதுகுறித்து உள்துறை அமைச்சர் ராஜ்நாத் சிங் கூறுகையில் , ""இந்த நியமனங்களில், விதி முறைகளின்படி நாங்கள் செயல் படுவோம்'' என்று அவர் பதிலளித்தார்.

மேலும் சிவசேனையுடனான கூட்டணி முறிவு குறித்தும் அக்கட்சியைச்சேர்ந்த அமைச்சர் அனந்த் கீதே அமைச்சரவையில் தொடர்வது குறித்தும் அவர் கூறுகையில்

மகாராஷ்டிர சட்டப் பேரவைத் தேர்தல் நடைபெற உள்ள நிலையில், சிவசேனையுடன் பாஜகவின் கூட்டணி முறிந்தது துரதிருஷ்டவசமானது. இந்தக்கூட்டணி தொடர்பாக நாங்கள் நீண்ட விவாதம் நடத்தினோம். எனினும் துரதிருஷ்டவசமாக அந்தப் பேச்சு வார்த்தைகள் பலனளிக்கவில்லை.

மத்திய அமைச்சரவையில் சிவசேனையை சேர்ந்த அனந்த்கீதே தொடர்வது குறித்து எங்கள் கட்சி இன்னும் முடிவு செய்ய வில்லை. அதுகுறித்து நாங்கள் இன்னும் விவாதிக்கவில்லை.

சிவசேனையுடனான கூட்டணியில் இருந்து விலகிய போதிலும், மகாராஷ்டிரத்தில் பாஜக அறுதிப் பெரும்பான்மையுடன் வெற்றிபெறும். இத்தேர்தலில் நாங்கள் முழு நம்பிக்கையுடன் போட்டியிட்டு, வெற்றிபெறுவோம்.

மகாராஷ்டிர பேரவை தேர்தலில் பாஜக வெற்றிபெற்றால் நிதின்கட்கரி முதல்வராகும் வாய்ப்பு குறித்து கேட்கிறீர்கள். பாஜக வெற்றி பெறும் பட்சத்தில் அரசுக்கு தலைமை தாங்குவது யார் என்பதுகுறித்து கட்சியின் ஆட்சிமன்ற குழு முடிவு செய்யும் என்றார் ராஜ்நாத் சிங்.