தமிழக முன்னாள் முதல்வர் ஜெயலலிதாவுக்கு சிறைத்தண்டனை விதிப்பு, திமுக மீது மக்களுக்கு உள்ள அதிருப்தி போன்றவற்றால் தமிழக அரசியலில் ஏற்பட்டுள்ள வெற்றிடத்தை நிரப்பும்கட்சியாக பாஜக திகழும் என்று மேலிடப் பொறுப்பாளர், முரளிதர் ராவ் தெரிவித்துள்ளார்.

இதுகுறித்து தில்லியில் செய்தியாளர்களிடம் அவர் கூறியதாவது:

தமிழகத்தில் குடியரசுத் தலைவர் ஆட்சி அமைப்பது தொடர்பாக சிலதலைவர்கள் விடுக்கும் கோரிக்கை பற்றி கருத்துக்கூற பாஜக விரும்பவில்லை. மக்களவை தேர்தலின்போது தமிழகத்தில் திமுகவுக்கு காணப்பட்ட அதிருப்தி இப்போதும் தொடருகிறது. ஒருபுறம் ஜெயலலிதா சிறையில் இருப்பது, மறுபுறம் தி.மு.க.,வுக்கு எதிரான அதிருப்தி நிலை ஆகியவை தொடர்வதால் தமிழகத்தில் மிகப்பெரிய வெற்றிடம் ஏற்பட்டுள்ளது. இந்த வாய்ப்பை பயன்படுத்தி மாநிலத்தில் பாஜக.,வை பலப்படுத்தி வெற்றிடத்தை நிரப்பும்கட்சியாக பாஜக திகழும்.

2016ல் முக்கியப்பங்கு வகிக்கும்: 2016-ஆம் ஆண்டு நடைபெறவுள்ள தமிழக சட்டப் பேரவைத் தேர்தலை வெற்றிகரமாக சந்திக்கும் வகையில், பாஜகவை வழி நடத்திச் செல்லக் கூடிய தகுதிவாய்ந்த தலைவர்களைக் கண்டறிந்து வருகிறோம். தமிழகத்தில் அடுத்த சட்டப் பேரவைத் தேர்தலில் பாஜக முக்கியப்பங்கு வகிக்கும்.

மக்களவைத் தேர்தலின் போது தமிழகத்தில் தேமுதிக, மதிமுக, பாமக உள்ளிட்ட கூட்டணி கட்சிகளுடன் மேற்கொண்டிருந்த நல்லுறவு இப்போதும் நீடித்துவருகிறது என்றார் முரளிதர் ராவ்.