விபரீதங்களுக்கான விஷ வித்துக்கள்
தேசிய ஜனநாயக கூட்டணியிலிருந்து மதிமுக வெளியேறியதாக அதன் பொதுச் செயலாளர் வைகோ அறிவித்துள்ளார். இவர் கூட்டணியிலிருந்து வெளியேறியதைப் பற்றி விரிவாக எழுத வேண்டிய நிலை இல்லை. ஆனால் இந்திய நாட்டின் குடிமகன் என்ற முறையில், வைகோவின் பேச்சு அமைந்திருக்கிறதா என்றால் இல்லை என்றே கூறலாம். இவரின் பேச்சில் தேசவிரோத கருத்துக்கள் எவ்வாறு இருந்தன என்பதை பார்க்கலாம்.

நவம்பர் 27, 2014 அன்று சென்னையில் நடந்த 'பினாங்கு பிரகடனம்' என்ற கூட்டத்தில் வைகோ பேசும்போது, காத்மாண்டில் நடந்த சார்க் மாநாட்டில், இந்திய பிரதமர் நரேந்திர மோடி, இலங்கை அதிபரிடம் வரும் இலங்கை தேர்தலில் தாங்கள் வெற்றி பெற வாழ்த்துகிறேன் என்று கூறியதை கண்டிக்கும் விதமாக பைபிளில் இருக்கும் ஒரு வாசகத்தை முன் வைத்தார். பன்றிகளுக்கு முன்னாள் முள்ளை வைக்காதீர்கள் என்ற வாசகத்தை கூறிவிட்டு அவ்வளவு தான், அதற்கு மேல் பேச மாட்டேன் என்றார். ஒரு நாட்டின் பிரதமரை இவ்வாறு விமர்சிப்பது சரியா?
இதே கூட்டத்தில், 1948ல் காஷ்மீரில் வாக்கெடுப்பு நடத்தப்படும் என நேரு கொடுத்த வாக்குறுதி என்னவாயிற்று; 1958, 1968 என பல கட்டங்களில் இதே கோரிக்கை எழுந்தபோது, காஷ்மீரில் தேர்தல் நடந்து விட்டது. அதுவே கருத்து கணிப்பு என்று நேரு கூறிவிட்டார். ஆகவே அது எப்படி கருத்து கணிப்பாக இருக்கும் என்ற கேள்வியை எழுப்பி, காஷ்மீர் பிரச்சினையை கிளப்பிப் போட்டு இருக்கிறேன். தேவைபட்டால், காஷ்மீர் பிரச்சினையை மீண்டும் எழுப்புவேன் என்று பேசியது, இவரின் தேச விரோத செயலாகவே பார்க்க வேண்டும். 67 ஆண்டுகளுக்கு பிறகு காஷ்மீர் பிரச்சினையை எடுப்பது, வைகோவின் முஸ்லிம் பாசம் என்பதை விட, பிரிவினை வாதிகளுக்கு வக்காலத்து வாங்குபவர் என்பதையே காட்டுகிறது.

1948ல் ஐ.நா.சபையில் நிறைவேற்றப்பட்ட தீர்மானத்தின் படி பாகிஸ்தான் நடக்கவில்லை என்பதையோ அல்லது, தான் பிடித்த பகுதிகளில் சிலவற்றை சீனாவிற்கு பாகிஸ்தான் தாரைவார்த்து கொடுத்தது பற்றியோ வைகோ வாய் திறக்கவில்லை. 2008ம் வருடம் லண்டனில் நடந்த தமிழ் மாநாட்டில் கலந்துகொள்ள வைகோ முயன்ற போது, இங்கிலாந்து அரசு விசா கொடுக்கவில்லை. இதற்கு காரணமாக கூறியது, வைகோ தேச விரோத பேச்சுக்காக கைது செய்யப்பட்டு, ஜாமீனில் வெளியே வந்தது என்று கூறப்பட்டது.

2011 செப்டம்பர் 23ல் சென்னையில் தமிழ் அமைப்புகள் சார்பாக ஏற்பாடு செய்யப்பட பொதுக் கூட்டத்தில் வைகோ பேசியது இது: "சாந்தன், முருகன், பேரறிவாளன் ஆகிய மூவருக்கும் விதிக்கப்பட்ட தூக்கு தண்டனையை இந்திய அரசு நிறைவேற்றுமானால், தமிழகம் இந்திய யூனியனிலிருந்து பிரிந்து விடும். 2047ல் இந்தியாவின் நூறாவது சுதந்திர தினம் கொண்டாடும் போது, தமிழ்நாடு இந்தியாவின் ஒரு பகுதியாக இருக்காது".

விடுதலைப் புலிகளுக்கும், இலங்கை அரசுக்கும் நடந்த யுத்தத்தின் போது, இந்தய அரசு இலங்கை அரசுக்கு ஆயுதங்கள் கொடுப்பதாக உறுதியற்ற தகவல்கள் வெளியே கசிந்த போது, வைகோ விடுத்த அறிக்கை, "இந்திய அரசாங்கம் இலங்கை ராணுவத்திற்கு ஆயுதங்கள் வழங்கினால், நாங்களும் இலங்கையில் உள்ள எங்கள் சகோதரர்களுக்கு ஆயுதங்கள் வழங்குவோம். வெளிப்படையாகவே நான் ஈழத்திற்கு செல்வேன். இதற்காக இங்குள்ள இளைஞர்களை தயார்செய்து போருக்கு அனுப்புவோம்" என வைகோ பேசியதும் இந்திய இறையாண்மைக்கு விரோதமானது என்பதை புரிந்து கொள்ள வேண்டும்.

இலங்கையைத் தன் வசமாக்கிக் கொண்டு, பல பெரிய திட்டங்களை செயல்படுத்த தொடங்கி விட்டது சீனா. பாதுகாப்பு கட்டமைப்பு உள்பட, சீனாவின் நீர் மூழ்கிக் கப்பல்கள் ஹிந்து மகா சமுத்திரத்தில் இலங்கையின் எல்லையில் நிறுத்தி வைக்கப்பட்டுள்ளன. இது இந்தியாவை அச்சுறுத்தவே என்பது சின்ன குழந்தைக்கு கூட நன்கு தெரியும். இதே நேரத்தில் இந்தியா – இலங்கை கசப்பை பயன்படுத்தி, பாகிஸ்தான் இலங்கை மண்ணிலிருந்து தீவிரவாதிகளை தயார் செய்து தமிழகத்தின் வழியாக தென்னிந்தியாவை குறிபார்க்கிறது. இதற்காக பாகிஸ்தான் தூதரகத்திலிருந்து வியாபாரிகள் என்ற போர்வையில் தமிழகத்தில் ஊடுருவல் நடந்து வருகிறது.

இந்த தருணத்தில் இந்தியா இலங்கையை பகை நாடாக அறிவித்தால், ஒரே நேரத்தில் பாகிஸ்தான், சீனா, இலங்கை ஆகிய மூன்று நாடுகளின் தாக்குதல்களை சமாளிக்க வேண்டும். இந்த சூழ்நிலையை புரிந்து கொள்ளாமல், தமிழகத்தில் உள்ள வைகோ போன்றவர்கள் இந்தியாவிற்கு எதிரான கருத்துக்களை வைப்பது சரியா? ஐம்பது ஆண்டுகளுக்கு மேலாக ஆட்சி செய்த காங்கிரஸ் கட்சியின் வெளியுறவுக் கொள்கையின் காரணமாக, இந்தியாவை சுற்றியுள்ள நாடுகள் நட்பு நாடுகளாக இருக்கவில்லை. இந்த மாற்றத்தின் காரணமாகவே இலங்கை கொள்கை வகுக்கப்பட வேண்டும் என்பதை புரிந்து கொள்ளாமல், தனது அரசியல் சுயநலத்திற்காக மட்டுமே கட்சி நடத்தும் வைகோ போன்றவர்களுக்கு விவேகம் உதயமாகுமா?

நன்றி : – ஈரோடு சரவணன்