ஆர். கே., நகர் இடைத் தேர்தலில் பணப்பட்டுவாடா நடந்துவரும் வேளையில் சென்னையில் முக்கிய அதிகாரிகள் அமைச்சர் விஜய பாஸ்கர், எம்.எல்ஏ.,க்கள் விடுதி உள்ளிட்ட 30 இடங்களில் வருமானவரித் துறை அதிகாரிகள் சோதனை நடத்திவருகின்றனர்.

சென்னை கிரீன்வேஸ் சாலையில் உள்ள, தமிழக சுகாதாரத் துறை அமைச்சர் விஜய பாஸ்கர் வீட்டில் இன்று (ஏப் -7) காலைமுதல் வருமானவரித் துறையினர் சோதனை நடத்தி வருகின்றனர். அவருக்கு சொந்தமான புதுக்கோட்டையில் உள்ள கல்லூரி, கல்குவாரி உள்ளிட்ட தமிழகத்தில் மொத்தம் 30 இடங்களில் சோதனை நடந்துவருகிறது. அமைச்சர் முறையாக வரி செலுத்தவில்லை என்ற புகாரில் அதிகாரிகள் சோதனை நடத்திவருகின்றனர். ஆர்.கே.நகர் இடைத் தேர்தலில் பணப் பட்டுவாடா எதிரொலியாகவும் சோதனை நடந்துவருவதாக தகவல்கள் தெரிவிக்கின்றன..

எம்ஜிஆர் மருத்துவ பல்கலைக்கழக துணைவேந்தர் உள்ளிட்ட அமைச்சரின் இலாகாவின் கீழ்வரும் அரசு அதிகாரிகள் வீட்டிலும் சோதனை நடை பெற்றுவருகிறது. ஊழலில் திளைக்கும் அதிமுக ஆட்சியில் தமிழகம் மிகப் பெரிய தலைகுனிவை சந்தித்து வருகிறது என்பதற்கு இந்த வருமான வரித்துறை சோதனைகள் எல்லாம் சாட்சியமாக அமைந்துள்ளன.

அதிமுக ஆட்சிக்கு வருமான வரித் துறை சோதனை புதிதல்ல. அரவக் குறிச்சி தேர்தலின் போது கரூர் அன்புநாதன் வீட்டில் வருமான வரித் துறை சோதனை நடைபெற்றது. அதைத் தொடர்ந்து சிலமாதங்கள் கழித்து மின்சாரத்துறை அமைச்சராக இருந்த நத்தம் விஸ்வநாதன் வீட்டிலும், சென்னை மாநகரத்தின் மேயராக இருந்த சைதைதுரைசாமி வீட்டிலும் வருமான வரிச் சோதனை நடைபெற்றது.

ஜெயலலிதாவின் மறைவிற்கு பிறகு, பன்னீர்செல்வம் முதல்-அமைச்சாரக இருந்தபோது தமிழகத்தின் தன்மானச் சின்னமான தலைமைச் செயலகத்திலேயே வருமான வரித் துறை சோதனை செய்யப்பட்டது. குறிப்பாக கோட்டையில் உள்ள தலைமை செயலாளர் ராம் மோகன்ராவ்  அலுவலகத்திலேயே வருமான வரித்துறை சோதனை செய்யப் பட்டு தமிழக நிர்வாக வரலாற்றில் ஒருகரும்புள்ளி வைக்கப்பட்டது. பிறகு மணல் மாபியா சேகர் ரெட்டி வீட்டில் வருமான வரித்துறை சோதனை நடத்தப்பட்டது என்பது குறிப்பிடத்தக்கது.