பாகிஸ்தானின் பஞ்சாப் மாகாணத்தில் உள்ள நரோவால் மாவட்டத்தில் ராவி நதிக் கரையோரத்தில் ஸ்ரீ நான்கானா சாஹிப் என்ற இடத்தில் 550 ஆண்டுகளுக்கு முன்னர் சீக்கிய மதத்தை தோற்றுவித்த குரு நானக் தேவ் பிறந்ததாக நம்பப்படுகிறது.

அவர் உயிர்நீத்த இடம் அதே மாகாணத்துக் குட்பட்ட கர்தார்ப்பூரில் சமாதியாக பாதுகாக்கப்பட்டு வழிபாடுகள் நடைபெற்று வருகின்றன. குருநானக் தேவின் 550-வது பிறந்தநாள் நவம்பர் 12-ம் தேதி கொண்டாடப்படுகிறது.

இதையொட்டி,  குருநானக்தேவின் 550-வது பிறந்தநாளையொட்டி, பாகிஸ்தானில் உள்ள சீக்கிய குருத்வாராவுக்கு செல்லும் இந்தியபக்தர்களின் வசதிக்காக இந்தியா-பாகிஸ்தான் அரசுகளால் கர்தார்பூர் பாதை அமைக்கப்பட்டது.

இந்த கர்தார்பூர் பாதைவழியாக அன்றாடம் 5 ஆயிரம் இந்திய பக்தர்களுக்கு அனுமதி அளிக்க பாகிஸ்தான் அரசு  தீர்மானித்துள்ளது. இதற்காக பாகிஸ்தான் செல்லும் சீக்கியர்கள் பாஸ்போர்ட் கொண்டுசெல்ல தேவையில்லை. இந்தியாவில் வாழ்வதற்கான ஏதாவது ஒரு அரசு ஆவணத்தை காண்பித்தால்போதும்.

இந்நிலையில், இந்தியாவின் தரப்பில் பஞ்சாப் மாநிலத்தில் உள்ள டேரா பாபா நானக் குருத்வாரா அருகேயுள்ள ஷிக்ஹார் மைஷான் முகாம்பகுதியில் கர்தார்பூர் பாதையையும் புதிதாக அமைக்கப்பட்ட சோதனைச்சாவடியையும் பிரதமர் நரேந்திர மோடி இன்று திறந்துவைத்தார்.

‘இந்தபாதையை திறந்துவைத்து, நாட்டு மக்களுக்கு அர்ப்பணிப்பதை எனக்கு கிடைத்த பாக்கியமாக கருதுகிறேன். ஆன்மிக   சேவைசெய்யும் சீக்கிய மக்களுக்கு ஏற்படும் அதே உணர்வினை இந்த புனித மண்ணில் நிற்கும் வேளையில் உணர்கிறேன்.

குருநானக் தேவ் சீக்கியர்களுக்கு மட்டுமான சொத்து அல்ல. ஒட்டு மொத்த மனித குலத்துக்குமான ஊக்கசக்தியாக அவர் விளங்கினார். குருநானக் தேவ் ஒருகுருவாக மட்டுமல்லாமல் நமது சிந்தனையாகவும் வாழ்க்கையின் அடித்தள மாகவும் திகழ்ந்தார்.

இந்த பாதையை அமைப்பதற்கு உழைத்த பாகிஸ்தான் பிரதமர் இம்ரான்கானுக்கு நான் நன்றி தெரிவித்துக் கொள்கிறேன். கர்தார்பூர் பாதை விவகாரத்தில் இந்தியாவின் உணர்வுகளை அவர் புரிந்து கொண்டார். அதற்கு மதிப்பளித்து, உரியவகையில் செயலாற்றினார்’ என பிரதமர் மோடி குறிப்பிட்டார்.