தமிழகத்தில் 1967 முதல் கடந்த 46 ஆண்டுகளாக திராவிடக்கட்சிகள்தான் மாறி மாறி ஆட்சி அதிகாரத்தில் இருந்து வருகிறார்கள் . ஜாதி , மத பேத மற்ற சமுதாயத்தைப் படைப்போம் என வாய கிழிய பேசி வந்தவர்களின் ஆட்சியில் ஜாதிச் சண்டைகள் தொடரத்தான் செய்கின்றன .

தர்மபுரியில் நடைபெற்ற ஜாதிக் கலவர வடுக்கண் மறையும் முன்பே இப்போது மரக்காணத்தில் ஜாதிக் கலவரம் வெடித்துள்ளது .

இதற்கு முக்கியமான காரணம் அரசியல் தான். தேர்தலையும் , ஓட்டுக்களையும் மையமாக வைத்து ஜாதி உணர்வுகளை வளர்த்து வரும் போக்குதான் காரணமாகும் . துரதிர்ஷ்டம் என்னவென்றால் மோதிக் கொள்ளும் இரண்டு சமூகங்களும் ஹிந்து சமூகங்களே.

இதற்கு என்னதான் தீர்வு ?

தீண்டாமை முற்றிலும் நீக்கப்படவேண்டும் . ஜாதியின் பெயரால் யாரும் உயர்ந்தவர் , தாழ்ந்தவர் கிடையாது .

வேதங்களை தொகுத்தளித்தவர் மீனவ குல பெண்ணின் மைந்தன் வியாசன் தானே …! ராமாயணத்தை எழுதியவர் வேடர் குல வால்மீகி தானே …! கடவுளுக்கு தனது கண்களையே தந்த கண்ணப்பனும் , நந்தனாரும் கடவுளுக்குப் பிரியமானவர்களே ! கனகதாசருக்காக உடுப்பி கிருஷ்ணரே கோயிலின் பின்புறமாக திரும்பி நிற்கிறாரே ! ராமானுஜர் காவேரியில் குளிக்கச் செல்லும் போது ஒரு பிராம்மண சீடரின் தோளில் கைபோட்டுச் செல்வார் . குளித்து விட்டு வரும் போது ஒரு ஹரிஜன சீடரின் தோள் மீது கைபோட்டு வருவார் . நமது மகான்கள் எவரும் தீண்டாமையை ஏற்றுக் கொண்டதில்லை .

ஹிந்து தர்மத்தில் ஜாதிக்கு இடமில்லை . ஹிந்துக்கள் அனைவரும் ஒரு குடும்பமே . இதைத்தான் ஆர்.எஸ்.எஸ் . கடந்த 90 ஆண்டுகளாக சொல்லி வருகிறது .

ஹிந்து ஒற்றுமை என்று ஆர்.எஸ்.எஸ் சொன்னால் அதை வகுப்புவாதம் , மதவாதம் என குறை கூறுபவர்கள் ஜாதி அமைப்பை ஆதரிப்பதுதான் வேடிக்கையானது .

ஆர்.எஸ்.எஸ் தலைவராக இருந்த பாளா சாகேப் தேவரஸ் கூறியது நினைவு கூறத்தக்கது .

தீண்டாமை பாவமில்லையெனில் உலகில் வேறு எதுவுமே பாவம் இல்லை . எனவே தீண்டாமை வேரும் , வேரடி மண்ணுமில்லாமல் நீக்கப்பட வேண்டும் .

பேசியது போதும் செயல் படுவோம்