தமிழகத்திற்கு காவிரி நீரை கொண்டு வரும் முயற்சியில் அனைத்து கட்சிகளும் ஒருங்கிணைந்து செயல்படவேண்டும் என பாஜக. மாநில தலைவர் பொன்.ராதாகிருஷ்ணன் கருத்து தெரிவித்துள்ளார் .

இது குறித்து, அவர் மேலும் தெரிவித்ததாவது ;

காவிரி மேற்பார்வைகுழு

தமிழ்நாட்டில் குறுவைசாகுபடிக்காக வழக்கமாக ஜூன் 12-ந் தேதி காவிரியில் தண்ணீர் திறந்து விடப்பட வேண்டும். ஆனால், காவிரி நீர் தமிழகத்திற்கு திறந்துவிடப் படாததால் கர்நாடக அரசுக்கு ஆணையிடவும், காவிரி நடுவர்மன்ற இறுதி தீர்ப்பை அமல்படுத்து வதற்காகவும் மத்திய அரசால் அமைக்கப்பட்டது காவிரி மேற்பார்வை குழு.

காவிரி நடுவர் மன்ற இறுதிதீர்ப்பை அரசிதழில் வெளியிட்டபின்பு காவிரி மேலாண்மைகுழு என்னும் நிரந்தரகுழுவை ஏற்படுத்தி இப்பிரச்சனைக்கு நிரந்தரதீர்வு காணமுயலாமல் காவிரி மேற்பார்வைகுழு என ஒரு தற்காலிக குழுவை அமைத்தது மத்திய அரசு தமிழகத்திற்கு செய்த மிகப்பெரிய தீங்காகும்.

டெல்லியில் நடந்த இக்குழுவின் கூட்டத்தில் தமிழக குறுவைசாகுபடிக்கு காவிரியில் தண்ணீர் திறக்கும்படி கர்நாடக அரசுக்கு உத்தரவிடமுடியாது என்று அறிவித்திருப்பதன் மூலம் மத்தியஅரசால் அமைக்கப்பட்ட இக்குழுவால் தமிழகத்திற்கு எந்தபலனும் இல்லை என்பதை உணரமுடிகிறது.

மேலும் இக்குழுவால் காவிரிநீர் பங்கீட்டில் எந்த ஒரு உறுதியான முடிவும் எடுக்கமுடியாது என்பதோடு காவிரிப்பிரச்சனையில் எந்த ஒருதீர்வும் கிடைக்காது என்பது நேற்றைய கூட்டத்தின் முடிவுமூலம் உறுதிப்படுத்தப்பட்டுள்ளது.

சுப்ரீம்கோர்ட் தீர்ப்பை அமல்படுத்த முடியாத மத்திய அரசின் மெத்தனபோக்கு மத்தியில் ஆளும் காங்கிரஸ் அரசாங்கம் நாட்டை ஆளும் தகுதியை இழந்து விட்டதையே காட்டுகிறது. சுப்ரீம்கோர்ட் உத்தரவுப்படி 2012-13-ம் பாசன ஆண்டில் தமிழகத்திற்கு வழங்கியிருக்கவேண்டிய தண்ணீரை வழங்காததோடு தற்போது குறுவைசாகுபடிக்கும் தண்ணீர் திறந்துவிடாதது தமிழக விவசாயிகளை கடும்சோகத்தில் ஆழ்த்தியுள்ளது.

கடந்த 2001 ,2011-ம் ஆண்டுகளுக்கு இடைப்பட்ட 10 வருட காலத்தில் தமிழக மக்கள்தொகை 97 லட்சம் அதிகரித்து 7 கோடியே 21லட்சமாக உயர்ந்துள்ளநிலையில், இதேபத்தாண்டு காலத்தில் மட்டும் 8லட்சத்து 67 ஆயிரத்து 582 தமிழகவிவசாயிகள் விவசாயத்தால் ஏற்பட்ட இழப்பீட்டை தாங்கமுடியாததாலும், நகர மயமாக்கல், தொழில் மயமாக்கல் போன்றவற்றால் விவசாயசாகுபடி பரப்பு குறைந்துவருவதாலும், விவசாயத்தை கைவிடும் விவசாயிகளின் எண்ணிக்கை மேலும் அதிகரிக்கும்அபாயம் உருவாகிவருவதை மத்திய, மாநில அரசுகள் கவனத்தில் கொள்ள வேண்டும்.

இந்நிலையில், சாகுபடிக்கு போதுமானதண்ணீர் கிடைக்கவில்லை என்பது நிலைமையை மேலும் மோசமாக்கி விவசாயத்தையே கைவிடவேண்டிய கட்டாயத்திற்கு விவசாயிகள் தள்ளப் படுவார்கள். தமிழக விவசாயத்தை ஒட்டுமொத்தமாக அழித்து தமிழக விவசாயிகளை தற்கொலைநிலைக்கு தள்ளும் இந்த ஆபத்தானநிலையில் இருந்து தமிழக விவசாயிகளைகாப்பது அனைத்து அரசியல் கட்சிகளின் கடமையாகும். எனவே, தமிழகத்தைச்சேர்ந்த அனைத்து அரசியல்கட்சிகளும் பாகுபாடுகளை களைந்து காவிரி தண்ணீர் கொண்டு வரும் முயற்சியில் ஒருங்கிணைந்து செயல்படவேண்டும் என கேட்டுக்கொள்கிறேன் என்றார்.