கேதார்நாத் மழை – வெள்ளசேத துயரங்களுக்கு இடையே, உயிருக்குபோராடிய பக்தர்களிடம் கொள்ளையடித்தவர்கள் பிடிபட்டுள்ளனர். அவர்களிடமிருந்து ரூ.1 கோடிக்கும் அதிகமான ரொக்கப் பணம் மற்றும் தங்கநகைகள் மீட்கப்பட்டுள்ளன.

வரலாறு காணாத மழைவெள்ளத்தினால், ‘இமாலய சுனாமி’ என அழைக்கும் அளவுக்கு உத்தரகாண்ட் மாநிலத்தில் மிகப் பெரிய உயிர்ச் சேதம் ஏற்பட்டுள்ளது. புனித தலமான கேதார்நாத் மிகவும் அதிகஅளவுக்கு இந்தவெள்ளத்தால் பாதிக்கப்பட்டுள்ளது. அந்த கோவிலுக்கு வந்த ஏராளமானபக்தர்கள் பலியானார்கள்.

அவர்களுடைய உடல்கள் அனைத்தும் அகற்றப்பட்டு, கேதார்நாத்கோவிலில் வழிபாடு தொடங்கியது. இந்நிலையில், கடந்த ஒருவாரமாக வெள்ளத்தின் பிடியில் சிக்கித்தவித்த கேதார் நாத்தில் பலியானவர்களிடமும், உயிருக்குபோராடிய பக்தர்களிடமும் சாமியார் போர்வையில் சிலர் கொள்ளையடித்து இருப்பது நெஞ்சை பதைபதைக்கவைக்கிறது.

அப்படி கொள்ளையில் ஈடுபட்ட சிலர், மீட்புபணியில் ஈடுபட்டுள்ள இந்தோ-திபெத்திய எல்லை பாதுகாப்புபடை போலீசார் மற்றும் தேசிய பேரிடர் மீட்புபடையினரால் கைதுசெய்யப்பட்டு உள்ளனர். வெள்ளப் பகுதியில் இருந்து மீட்கப்பட்டவர்களுடன் அந்த கொள்ளையர்களும் ஹெலிகாப்டரில் வர முயன்ற போது பிடிபட்டனர்.

அவர்களில் சிலர் சுமக்கமுடியாத அளவுக்கு கனமான பைகளை வைத்திருந்தனர். அந்த பைகளுடன்தான் ஹெலிகாப்டரில் ஏறுவோம் என அவர்கள் அடம்பிடித்ததால் மீட்புபடையினருக்கு சந்தேகம் ஏற்பட்டது. உடனே அவர்களுடைய உடமைகளை சோதனையிட்ட போது, அந்த பைகளில் பக்தர்களிடம் இருந்து கொள்ளையடிக்கப்பட்ட நகைகளும், கட்டுக்கட்டாக கரன்சிநோட்டுகளும் இருந்ததை பார்த்து அவர்கள் அதிர்ச்சியடைந்தனர்.

வெள்ளத்தில் பலியானபக்தர்களின் உடலில் உள்ள நகைகளை மட்டுமின்றி, உயிருக்குபோராடிய பக்தர்களிடம் இருந்தும் அவர்கள் கொள்ளையடித்தது தெரியவந்துள்ளது. சில உடல்களின் கைவிரல்களை வெட்டி எடுத்தும் நகைகளை எடுத்து இருப்பதும் தெரியவந்துள்ளது.கேதார்நாத்தில் உள்ள பிரதானகோவிலில் உள்ள உண்டியல்கள் பாதுகாப்பாக உள்ளன. அதேநேரத்தில் மற்ற சிறு கோவில்களில் இருந்த உண்டியல்களும் உடைக்கப்பட்டு பணம் கொள்ளையடிக்கப்பட்டுள்ளது.