உலக வேலை வாய்ப்பு சந்தையை கைப்பற்றும் வகையில் சீனா மிகப்பெரிய நடவடிக்கை எடுத்துள்ளது. ஆனால் நம் நாட்டு இளைஞர்களை இதில் காண முடியவில்லை என குஜராத் முதல்வரும் பா.ஜ.க பிரதமர் வேட்பாளருமான நரேந்திரமோடி கூறியுள்ளார்.

குஜராத் மாநிலம், காந்திநகரில், மாநில தொழிலாளர் மற்றும் வேலை வாய்ப்புத் துறை சார்பில் இளைஞர்களுக்கான பல்வேறு திறன்வளர்ப்பு திட்டங்களை மோடி திங்கள்கிழமை தொடங்கிவைத்தார்.

இந்நிகழ்ச்சியில் மோடி பேசுகையில், “உலக வேலை வாய்ப்பு சந்தையை கைப்பற்றும் வகையில் சீனா மிகப்பெரிய நடவடிக்கை எடுத்துள்ளது. ஆனால் நம் நாட்டு இளைஞர்களை இதில் காண முடியவில்லை. நமது இளைஞர்களும் இந்த வேலை வாய்ப்புகளை பெறும்வகையில் நாம் யுக்திகளை வகுக்க வேண்டும்”

கடந்த ஆண்டு பட்ஜெட்டில் 10 லட்சம் இளைஞர்களுக்கு திறன்மேம்பாட்டு பயிற்சி அளிக்கப்படும் என்றும் இதற்காக ரூ.1000 கோடி செலவிடப்படும் என்றும் மத்தியஅரசு கூறியிருந்தது. ஆனால் இதுவரை 18 ஆயிரம் இளைஞர்களுக்கு மட்டுமே இந்த பயிற்சி அளிக்கப்பட்டுள்ளது.

வரும்மக்களவை தேர்தலுக்குப் பிறகு பாஜக ஆட்சிக்கு வருமானால் இளைஞர்களுக்காக புதியகொள்கை வகுக்கப்படும். இளைஞர்களின் திறன்மேம்பாட்டுத் திட்டங்கள் குஜராத்தில் செயல்படுத்தப் பட்டுள்ளதுபோல் நாடு முழுவதும் அமல்படுத்தப்படும்.

திறன்வளர்ப்புத் திட்டங்களுக்காக குஜராத் அரசை மத்திய அரசு பாராட்டி விருதுவழங்கியுள்ளது. இதில் குஜராத் காட்டியுள்ள வழியை மற்றமாநிலங்களும் பின்பற்றவேண்டும் மக்களவை தேர்தலையொட்டி தேர்தல் நடத்தை விதி முறைகள் விரைவில் அமலுக்கு வரவுள்ளன. வாக்குறுதிகளை நிறைவேற்றாதற்கு மத்திய அரசு இதை ஒருகாரணமாக சொல்லக்கூடும்” என்றார் மோடி.