பிரிக்ஸ் உச்சிமாநாட்டில் பங்கேற்பதற்காக பிரதமர் நரேந்திரமோடி நேற்று காலை புதுடெல்லியில் இருந்து பிரேசில் புறப்பட்டு சென்றார்.

ரஷ்யா, இந்தியா, பிரேசில், சீனா, தென் ஆப்பிரிக்கா ஆகிய நாடுகளின் கூட்டமைப்பான பிரிக்ஸின் 6-வது மாநாடு பிரேசிலின் போர்ட்லேஸா நகரில் ஜூலை 14, 15ம் தேதிகளில் நடைபெறுகிறது. இதில் பங்கேற்பதற்காக பிரதமர் நரேந்திரமோடி பிரேசில் புறப்பட்டார்.

அவருடன் மத்திய இணை அமைச்சர் நிர்மலா சீதாராமன், தேசியபாதுகாப்பு ஆலோசகர் ஏ.கே. தோவல், வெளியுறவுத் துறைச்செயலாளர் சுஜாதா சிங், நிதித்துறை செயலாளர் அரவிந்த் மாயாராம் ஆகியோர் அடங்கிய உயர்நிலைக் குழுவும் பிரேசில் பயணம் மேற்கொண்டுள்ளது.

டர்பனில் நடந்த மாநாட்டின் போது பிரிக்ஸ் வங்கி அமைக்க முடிவுசெய்யப்பட்டது. இதுகுறித்து பிரேசில் மாநாட்டில் விரிவாக விவாதிக்கப்பட உள்ளது. மேலும் ஐ.நா. பாதுகாப்புகவுன்சில் விரிவாக்கம் உள்ளிட்ட சர்வதேச விவகாரங்கள் குறித்து மாநாட்டில் ஆலோசனை நடத்தப்பட உள்ளது.

இந்த மாநாட்டில் ரஷ்ய அதிபர் விளாடிமிர் புதின், சீன அதிபர் ஜிஜின்பிங், தென்ஆப்பிரிக்க அதிபர் ஜேக்கப் ஜுமா, பிரேசில் அதிபர் தில்மா ரூசெப் ஆகியோரை பிரதமர் நரேந்திர மோடி தனித்தனியாக சந்தித்துப் பேசவுள் ளார்.

ஜூலை 16ம் தேதி பிரிக்ஸ் நாடுகளின் தலைவர்கள் பிரேசில் தலைநகர் பிரேசிலியாவில் கூடுகின்றனர். அப்போது, லத்தீன் அமெரிக்க நாடுகளான அர்ஜென்டினா, சிலி, கொலம் பியா, ஈக்வடார், கயானா, பராகுவே, பெரு, உருகுவே, வெனிசூலா ஆகிய நாடுகளின் தலைவர்களும் விருந்து நிகழ்ச்சியில் பங்கேற்க பிரேசில் அழைப்பு விடுத்துள்ளது. எனவே அந்த நாடுகளின் தலைவர்களையும் பிரதமர் மோடி சந்தித்துப் பேச உள்ளார்.