2016-ல் நரேந்திரமோடி பாகிஸ்தானுக்கு வரவேண்டும் என அந்நாட்டு பிரதமர் நவாஸ்ஷெரீப் விடுத்த அழைப்பை மோடி ஏற்று கொண்டதாக இந்திய வெளியுறவுசெயலர் ஜெய் சங்கர் தெரிவித்துள்ளார்.

மேலும், இரு நாடுகளுக்கும் இடையே தடைபட்டிருந்த பேச்சுவார்த்தையை மீண்டும் நடத்த இரு நாட்டு தலைவர்களும் விருப்பம் தெரிவித்துள்ளனர்.

ஷாங்காய் ஒத்துழைப்பு அமைப்பு மாநாட்டில் பங்கேற்றுள்ள இந்திய பிரதமர் நரேந்திர மோடியும் பாகிஸ்தான் பிரதமர் நவாஸ் ஷெரீபும் இன்று (வெள்ளிக்கிழமை) நேருக்குநேர் சந்தித்து பேசினர். ஒருமணி நேரம் இந்த சந்திப்பு நடைபெற்றது.

கடந்த ஆண்டு நவம்பர் மாதம் நேபாள தலை நகர் காத்மாண்டுவில் சார்க் உச்சிமாநாடு நடந்தது. அதில், இந்திய பிரதமர் மோடி, பாகிஸ்தான் பிரதமர் நவாஸ்ஷெரீப் கலந்து கொண்டனர். ஆனால், இரு தரப்பிலும் பேச்சு வார்த்தை ஏதும் நடைபெற வில்லை. அதற்கு முன்னதாக மோடியின் பதவியேற்பு நிகழ்ச்சியில் கலந்துகொண்ட போது ஷெரீப் – மோடி பேச்சுவார்த்தை நடைபெற்றது.

இந்நிலையில், ஓராண்டு இடைவெளிக்கு பிறகு மீண்டும் ஒரேயிடத்தில் கூடியுள்ள இந்திய பிரதமர் நரேந்திர மோடியும் பாகிஸ்தான் பிரதமர் நவாஸ்ஷெரீபும் நேருக்குநேர் சந்தித்து பேசினர்.

இந்த சந்திப்பிக்கு பின்னர் இரு நாட்டு சார்பிலும் கூட்டறிக்கை வெளியிடபட்டது. தேசிய பாதுகாப்பு ஆலோசகர் அஜித்தோவலும் பாகிஸ்தான் வெளியுறவிவகார ஆலோசகர் சர்தாஜ் அஜீசும் கூட்டறிக்கையை வெளியிட்டனர்.

அதில், "இந்தியாவும், பாகிஸ்தானும் தீவிரவாதம் எந்த உருவில் இருந்தாலும் அதை வன்மையாக கண்டிக்கின்றன. தெற்காசிய பிராந்தியத்தில் தீவிரவாதத்தை ஒழிக்க நடவடிக்கை எடுக்க இருநாடுகளும் முடிவு செய்திருக்கின்றன.

மும்பை தாக்குதல்வழக்கு விசாரணையை துரிதப்படுத்த இந்தியா – பாகிஸ்தான் இடையே முடிவு எட்டபட்டுள்ளது.எல்லை பாதுகாப்புபடை இயக்குநர், பாகிஸ்தான் ரேஞ்சர் இயக்குநர் இடையேயான பேச்சுவார்த்தை விரைவில் நடைபெறவேண்டும் என இருநாட்டு தலைவர்களும் விருப்பம் தெரிவித்துள்ளனர்.

அடுத்த ஆண்டு பாகிஸ்தானில் நடை பெறவுள்ள சார்க் உச்சிமாநாட்டில் பங்கேற்க வருமாறு பிரதமர் மோடிக்கு பாகிஸ்தான் பிரதமர் அழைப்புவிடுத்தார். பிரதமர் மோடியும் அந்த அழைப்பை ஏற்று கொண்டுள்ளார்" என தெரிவிக்கப்பட்டுள்ளது. கூட்டறிக்கையை வெளியிட்ட இரு நாட்டு பிரதிநிதிகளும் பத்திரிகையாளர்கள் கேள்விக்கு பதிலளிக்க மறுத்து விட்டனர்.