‘அரசியல் கட்சிகளிடம் ஒருமித்தகருத்து ஏற்பட்டால், எதிர்காலத்தில் நடக்கும் தேர்தலில் வாக்குச்சீட்டு முறையை மீண்டும் கொண்டு வருவது குறித்து பரிசீலிக்கலாம்’’ என்று பாஜக பொதுச்செயலாளர் ராம் மாதவ் தெரிவித்தார்.

தற்போது நாட்டில் முழுக்க முழுக்க மின்னணு இயந்திரங்களே பயன்பாட்டில் உள்ளன. ஆனால், மின்னணு வாக்குப் பதிவு இயந்திரங்களில் முறைகேடுகள் நடக்கின்றன. எந்தக் கட்சிக்கு வாக்களித்தாலும் குறிப்பிட்ட கட்சிக்கே (ஆளும் கட்சி) வாக்குகள் பதிவாகும்வகையில் மின்னணு வாக்குப் பதிவு இயந்திரங்களில் தில்லுமுல்லு நடக்கிறது என்று சமாஜ்வாதி, பகுஜன் சமாஜ், ஆம் ஆத்மி, பாமக உட்பட பல கட்சிகள் புகார்கள் தெரிவித்தன.

கடந்த 2017-ல் உத்தரபிரதேச சட்டப்பேரவைத் தேர்தலில் 403 தொகுதிகளில், பாஜக 325 இடங்களில் வெற்றிபெற்று ஆட்சியைப் பிடித்தது. அதன்பிறகு மின்னணு வாக்குப் பதிவு இயந்திரங்களில் முறைகேடு என்ற புகார் அதிகமானது.

ஆனால், மின்னணு இயந்திரங்களில் முறைகேடு நடப்பதற்கு வாய்ப் பில்லை என்று தலைமை தேர்தல் ஆணையம் மீண்டும்மீண்டும் உறுதியாகத் தெரிவித்து வருகிறது.

எனினும் மின்னணு வாக்குப் பதிவு இயந்திரங்களுக்குப் பதில்மீண்டும் வாக்குச்சீட்டு முறையைக் கொண்டுவர வேண்டும் என்று எதிர்க் கட்சிகள் தொடர்ந்து வலியறுத்தி வருகின்றன. இந்நிலையில் டெல்லியில் நடந்த காங்கிரஸ் மாநாட்டில், வாக்குச் சீட்டு முறையை மீண்டும் கொண்டுவர வேண்டும் என்று கடந்த சனிக் கிழமை தீர்மானம் நிறைவேற்றப்பட்டது.

காங்கிரஸ் தீர்மானம் நிறைவேற்றப்பட்ட சிலமணி நேரங்களில், இது குறித்து பாஜக பொதுச் செயலாளர் ராம் மாதவ் செய்தியாளர்களிடம் கூறியதாவது:

மீண்டும் வாக்குச்சீட்டு முறையை கொண்டு வருவது குறித்து விரிவான ஆலோசனை நடத்தவேண்டும். எல்லா அரசியல் கட்சிகளும் அதற்கு ஒருமனதாக ஒப்புக்கொண்டால், எதிர்காலத்தில் நடக்கும் தேர்தல்களில் வாக்குச் சீட்டுகளைப் பயன்படுத்துவது குறித்து பரிசீலிக்கலாம்.

வாக்குச் சீட்டுக்குமாற்றாக மின்னணு வாக்குப் பதிவு இயந்திரங்களைப் பயன் படுத்தலாம் என்று அரசியல் கட்சிகளிடம் ஒருமித்த கருத்து ஏற்பட்ட பிறகு தான் அது நடைமுறைப்படுத்தப்பட்டது. இதை காங்கிரஸ் கட்சிக்கு நினைவுப்படுத்த விரும்புகிறேன். எனினும், வாக்குசீட்டு முறைக்கு மீண்டும் திரும்ப வேண்டும் என எல்லா அரசியல் கட்சிகளும் விரும்பினால், அனைவ ருடனும் ஆலோசனை நடத்தி முடிவெடுக்கலாம். இவ்வாறு ராம் மாதவ் கூறினார்.