"சாதிப்போம்' என்ற எண்ணம் படைத்துள்ள இன்றைய இளைய தலை முறையினரால் மட்டுமே உலகில் மாற்றங்களை கொண்டுவர முடியும் என்று பிரதமர் நரேந்திர மோடி தெரிவித்துள்ளார்.

நியூயார்க்கின் சென்ட்ரல் பூங்கா பகுதியில் சனிக் கிழமை நடைபெற்ற "உலகளாவிய குடிமக்கள் திருவிழா'வில் பிரதமர் நரேந்திர மோடி கலந்துகொண்டார். ஏராளமான அமெரிக்கர்கள், அமெரிக்க வாழ் இந்தியர்கள் உள்பட சுமார் 60,000 பேர் திரளாக கலந்துகொண்ட இந்நிகழ்ச்சியில், அமெரிக்காவின் பிரபல "ராக்' இசைக் கலைஞர்கள் ஜேய் ஸீ, பியான்ஸ் உள்ளிட்டோர் மெல்லிசைப் பாடல்களைப்பாடி கூட்டத்தினரை மகிழ்வித்தனர்.

இதைத்தொடர்ந்து நிகழ்ச்சித் தொகுப்பாளரும், பிரபல ஆஸ்திரேலிய நடிகருமான ஹியூ ஜேக் மேன், பிரதமர் மோடியை அறிமுகம் செய்துவைத்தபோது, ""எளிமையான "தேநீர் விற்பனையாளராக' இருந்து இந்தியாவின் பிரதமராக உயர்ந்தவர் மோடி'' என்று குறிப்பிட்ட போது கூட்டத்தினர் பலத்த கரகோஷத்தை எழுப்பிப் பாராட்டினர்.

இதில் உற்சாகமடைந்த மோடி, கூட்டத்தினரை பார்த்து கைகுவித்து இங்கு கூடியிருப் போருக்கும், தொலைக்காட்சி, இணையத்தின் மூலம் நிகழ்ச்சியை பார்த்துக் கொண்டிருக்கும் அனைவருக்கும் "நமஸ்தே' என்றபோதும் பலத்தகரகோஷம் எழுந்தது. இதையடுத்து நிகழ்ச்சியில் மோடி ஆற்றிய உரை:

இங்கு குழுமியிருப் போரிடம் நிலவும் தன்னம்பிக்கையை என்னால் உணரமுடிகிறது. எதிர்கால சந்ததியினரான உங்களது செயல்கள் தான் நாளைய வரலாற்றை தீர்மானிக்கும். உங்களுடன் இணைந்துள்ளதால் எதிர் காலத்தைப் பற்றிய எனது நம்பிக்கை வலுப்பெறுகிறது. உங்களையும், உங்களது தேசங்களையும், குடும்பத்தார், தோழர்களையும் வணங்குவதில் நான் பெரும்மகிழ்ச்சி அடைகிறேன்.

முதியவர்களின் அனுபவங்களை கொண்டு தான் உலகில் மாற்றங்கள் உருவாகும் என்று சிலர் நம்புகின்றனர். ஆனால், என்னை பொருத்த வரை, இளைய தலைமுறையினரின் சித்தாந்தங்கள், புதுமைகள், ஆற்றல், சாதிப்போம் என்ற உறுதி ஆகியவை அதைக் காட்டிலும் சக்தி படைத்தவை என்பேன்.

அதேபோல், இந்தியாவில் உள்ள 80 கோடி இளைஞர்களின் சக்தி கைகோத்தால், அது தேசத்தில் மிகப் பெரும் மாற்றங்களைக் கொண்டு வந்துவிடும்.

உலகளாவிய மாற்றத்தை கொண்டு வருவதற்காக இங்கு திரண்டிருக்கும் இயக்கத்தினருடன், இந்திய இளைஞர்களும் தங்களை இணைத்துக்கொள்ள முன்வருவார்கள் என்றார் மோடி.